Немаше победник во последниот саботен натпревар од 25-то коло на англиската Премиер лига, дерби пресметката на стадионот „Етихад“ меѓу Манчестер Сити и Челзи заврши со резултат 1:1.
Челзи одигра многу добар натпревар во кој умешно и згуснато се бранеше, но беше подеднакво опасен за домаќините при контранападите. Еден таков продор беше крунисан со гол за гостите 1;0 во 42. минута, а стрелец беше Стерлинг, поранешен играч на Манчестер Сити.
Вистинската опсада на голот на гостите од Лондон дојде дури на крајот. Халанд го промаши невозможното во 78. минута, од непосредна близина шутираше над голот, но Манчестер Сити пет минути подоцна израмни. Родри шутираше од 15 метри и погоди за 1:1. Иако домашните создаваа притисок до крајот, не стигнаа до пресврт.
Манчестер Сити е трет на табелата и има четири бода помалку од Ливерпул, односно два помалку од Арсенал. Тимот на Жосеп Гвардиола има натпревар помалку. Челзи е на 10-то место.
Фудбалерите на Арсенал многу убедливо си ја завршија работата во 25-то коло, на гостински терен го победија Барнли со 5:0. Веќе во четвртата минута Арсенал поведе со голот на Одегард, а потоа Сака постигна два гола во низа за 3:0, во 41. минута од пенал и во 47. минута. До крајот на натпреварот уште двапати беше затресена домашната мрежа, а погодија Тросар во 66. минута и Хаверц во 78. минута.
Арсенал моментално е втор на табелата и заостанува два бода зад лидерот Ливерпул.
Њукасл одигра 2:2 против Бурнмаут остана без очекуваните домашни три бода. Сепак, Њукасл може да биде задоволен и со бод, бидејќи двапати губеше, а за 2:2 домашните погодија во 92. минута кога стрелец беше Ричи. Головите за гостите ги постигнаа Соланке во 51. минута и Семењо во 69. минута, а првиот гол за Њукасл го постигна Гордон од пенал во 58. минута.
Без бодови на домашен терен остана Тотенхем кој беше поразен од Вулверхемптон со 1:2. Херој на гостите беше Бразилецот Жоао Гомеш кој ги постигна двата гола, победничкиот во 63. минута.
Двоен стрелец беше и Оливер Воткинс, а неговата Астон Вила го победи Фулам на гости со 2:1. Со поразот на Тотенхем, Астон Вила сега скокна на четвртото место на табелата.
Важна победа оствари Нотингем Форест кој пред своите гледачи го победи Вест Хем со 2:0. Домашните погодија во судиското надополнување, а стрелци беа Авонији и Хадсон-Одои.
Фудбалерите на Ливерпул во првиот дуел од ова коло забележаа нова победа со која го потврдија првото место во табелата, славеа со 4:1 против Брентфорд. Првиот гол на натпреварот го постигна Уругваецот Дарвин Нуњез. Блесна контранападот на гостите, Диого Жота добро го исфрли Нуњез, кој го префрли домашниот голман. Трите бода на ова гостување ги потврди Ливерпул во 55. минута. Салах асистираше, а Аргентинецот Мекалистер одлично се справи со топката и ја смести во мрежата за 2:0. До крајот на натпреварот домашните постигнаа еден, а Ливерпул уште два гола. Стрелец за Брентфорд беше Тони во 75. минута, а за гостите Салах во 68. и Гакпо во 86. минута.
Во недела се играат два натпревари Шефилд Јунајтед – Брајтон и Лутон – Манчестер Јунајтед, додека последниот натпревар е закажан за понеделник. Ќе играат Евертон – Кристал Палас.
