Фудбалерите на Вест Хем Јунајтед и Брајтон ремизираа без погодоци во последниот натпревар од 20. коло во англиската Премиер лига, кој во вторникот вечерта се одигра на Олимпискиот стадион во Лондон.
Гостите беа поконкретниот тим, упатувајќи вкупно 22 удари кон противничкиот гол, а играчите на Вест Хем имаа само шест обиди, од кои само два во рамките на голот.
Вест Хем остана на шестото место со 34 бодови, а Брајтон скокна на седмата позиција со 31 бод.
Ливерпул е на врвот на табелата со 45 бодови, три повеќе од второпласираната Астон Вила. Манчестер Сити и Арсенал имаат по 40 бодови, но актуелниот шампион има натпревар помалку. Тотенхем е на петтото место со 39 бодови.
По интензивното темпо за време на божикните и новогодишните празници, елитните англиски клубови ќе имаат краток одмор од првенствените обврски бидејќи на 13-ти јануари ќе се одиграат првите натпревари од 21. коло.
Сепак, натпреварите од 3. коло во ФА Купот започнуваат веќе в четврток, а за една седмица ќе се играат и полуфиналните натпревари од Лига купот (Карабао).
