Холандски научници пријавиле исклучително долга инфекција со ковид-19 кај маж кој починал минатата година, откако бил позитивен на вирусот 613 дена, и предупредија на опасноста таквите пациенти да развијат опасни мутации на вирусот, пренесува германската новинска агенција dpa.
Повозрасен маж, кој бил изнемоштен од други болести, бил примен во болница во Амстердам во февруари 2022 година со инфекција со ковид-19, се вели во соопштението. Тој бил постојано позитивен на коронавирус до неговата смрт во октомври 2023 година или вкупно 613 дена.
Претходно беа регистрирани и други случаи на многу долги инфекции кај луѓе чиј имунолошки систем не можел успешно да се бори против коронавирусот.
Научниците предводени од Магда Вергуве од Универзитетот во Амстердам планираат да ги претстават резултатите на Конгресот на Европското здружение за клиничка микробиологија и заразни болести во Барселона од 27-ми до 30-ти април.
Случајот е интересен и за научниците, бидејќи коронавирусот може особено силно да мутира кај заразените толку долго време. Тоа го крие ризикот од појава на варијанти на вируси кои полесно го совладаат имунолошкиот систем на здравите луѓе.
Холандските научници континуирано земале примероци од мажот за да го анализираат генетскиот материјал на коронавирусот. Пронашле вкупно повеќе од 50 мутации во споредба со омикронската варијанта BA.1 која циркулираше во тој период, вклучувајќи ги и оние кои ќе му овозможат на вирусот да ја избегне имунолошката одбрана на човечкото тело.
Само 21 ден откако човекот го примил лекот против коронавирус, вирусот покажал знаци на отпорност кон него. Мажот на крајот починал поради избувнување на една од претходните болести од кои боледувал.
Колку што е познато, тој не заразил никого со мутираните верзии на коронавирусот SARS-CoV-2 што се развиле кај него.
Овој случај „го нагласува ризикот од појава кај имунокомпромитирани пациенти на нови варијанти на SARS-CoV-2 кои го избегнуваат имунолошкиот систем“, велат научниците во соопштението за печатот.
Ваквиот развој на вирусот кај еден пациент може да доведе до појава на уникатни варијанти, предупредуваат тие и посочуваат дека е важно внимателно да се следи развојот на коронавирусот кај лицата со ослабен имунитет.
Постои ризик овие варијанти, кои се поотпорни на одбраната што ја обезбедува имунолошкиот систем на здравите луѓе, да се појават и да се шират во општеството, додаваат научниците.
