Во периодот од 28-ми октомври до 1-ви ноември, Управата за јавни приходи (УЈП) беше домаќин на Мајкл Харди и Дмитриј Јегоров, претставници од администрацијата на приходите на ММФ ФАД. Целта на еднонеделната посета беше да се направи длабински преглед на зрелоста на клучните функции на даночната администрација, како и да се анализираат резултатите од претходните препораки за развој на капацитетите на УЈП.
Во текот на посетата, беа одржани бројни средби со новиот менаџмент на УЈП, со кои активно се разговараше за имплементацијата на претходните препораки и приспособувањето на приоритетите за следната техничка помош, известуват од Управата.
Посебно внимание било посветено на развојот на стратегиите за обука и поддршка на тимовите, што покажува посветеност кон континуирано подобрување и адаптација на новите предизвици и проектите кои се дел од стратешките приоритети на УЈП.
„Новиот сет предизвици и проектите кои произлегуваат од стратешките приоритети на УЈП беа во фокусот на разговорите. На завршниот разговор со директорката на УЈП, Елена Петрова, и со Комитетот за стратешко и реформско управување, посебно внимание беше посветено на иницијативите и проектите од новиот стратешки план на УЈП за периодот 2025-2027, како и на Реформската програма на УЈП за периодот 2025-2028“, се наведува во дописот за медиумите .
Се додава исто така, дека оваа посета ја истакнува посветеноста на УЈП за континуирано подобрување на даночната администрација и за исполнување на стратешките цели, со цел зголемување на ефикасноста и транспарентноста во работењето.
