Шефот на приватната воена компанија „Вагнер“, Евгениј Пригожин, изјави дека неговите војници зазеле клучни воени објекти во јужниот руски град Ростов на Дон.
„Воените објекти на Ростов, вклучително и аеродромот, се под наша контрола“, рече Пригожин во видеото објавено во саботата наутро.
Тој рече дека неговите сили го зазеле штабот на руската армија на југот на земјата во град со над милион луѓе во пограничната област со Украина. Ова не можеше веднаш да се потврди независно. Министерството за одбрана во Москва сѐ уште не ги коментираше тврдењата на Пригожин.
Пригожин во видеото рече и дека борбените авиони за војната против Украина продолжиле да полетуваат од аеродромот во Ростов според планираното: „Авионите… полетуваат според планираното“.
Пригожин претходно тврдеше дека неговите војници собориле воен хеликоптер кој наводно нападнал цивилен конвој. Тој не обезбеди докази за своите тврдења и тие не можеа да бидат независно проверени.
Гувернерот на Ростовската област, Василиј Голубев, им порача на жителите да останат мирни и да останат внатре. Сегашната ситуација бара максимална концентрација на сите сили за одржување на редот, напиша тој на Telegram.
„Службите за спроведување на законот ги преземаат сите неопходни чекори за да се осигура безбедноста на жителите во областа“, напиша Голубев.
Властите на руската престолнина Москва и неговата околина прогласија вонредна антитерористичка состојба поради вооружениот бунт на водачот „Вагнер“.
„Со цел да се спречат можни терористички напади во градот и во московската област, воспоставен е режим на антитерористички операции“, објави во саботата наутро рускиот Национален антитерористички комитет.
Во Москва се засилени безбедносните мерки. Областа Вороњеж во југозападна Русија, која граничи со Украина, исто така прогласи ист тип на вонредна состојба.
Антитерористичката вонредна состојба им овозможува на руските власти да ги зголемат контролите и да го олеснат апсењето на граѓаните. Телефонските повици може да се прислушуваат почесто. Сепак, сѐ уште не е јасно какви конкретни мерки ќе бидат преземени во Москва и Вороњеж.
Во петокот, руската разузнавачка Федерална служба за безбедност (ФСБ) објави дека го истражува Пригожин за обид за воен удар.
Шефот на приватната армија повика на борба против военото раководство на Москва во петокот вечерта, јавува агенцијата Интерфакс. Пригожин го обвини военото раководство на Москва дека ги напаѓа неговите платенички трупи и се закани со контрамерки.
ФСБ и Министерството за одбрана на Русија ги отфрлија обвинувањата на Пригожин. „Сите обвинувања се лажни и се провокација“, се вели во соопштението на Министерството.