Во прифатниот камп во Гевгелија, поставени се два современи контејнери во кои е сместена привремена дневна болница за здравствена заштита на мигрантите.
Покрај ова, на терен продолжуваат работите за оградување на камп просторот, се тампонира приодниот пат, се инсталира мрежа за јавно осветлување и се поврзуваат сите пунктови кон електричната мрежа. До конечното уредување на септичката јама поставени се 10 пластични тоалети со најава дека ќе бидат поставени уште толку, а комуналната хигиена се одржува редовно со поставени контејнери и нови канти за отпадоци.
Во очекување на поголем бегалски наплив сите предвидени зафати во прифатниот камп ќе бидат завршени во најбрз можен рок. Состојбата во градот е нормализирана, просторот околу транспортниот центар е исчистен од отпадоци, а железничката и автобуската станица повторно функционираат нормално, пишува МИА.
Бегалците кои пристигнуваат во прифатниот камп, по евидентирањето од платформата крај прифатниот пункт се качуваат на специјалните возови за Табановце, а оние кои пристигнуваат по заминувањето на возовите патот кон северната граница и денеска го продолжуваат организирано со автобуси и такси возила.
