Германскиот производител на луксузни автомобили „Porsche“ во вторникот предупреди дека очекува послаби деловни резултати оваа година поради неочекуван недостиг од легури на алуминиум.
Поплавата во фабриката на европскиот добавувач на алуминиумска легура го загрози снабдувањето на „Porsche“, што влијае на производството на сите модели на автомобили, соопшти германската компанија, додавајќи дека на крајот може да биде принудена да го запре производството на една или повеќе серии возила.
Во писмото, добавувачот пријавил „виша сила“, се вели во соопштението за печатот на „Porsche“. Тоа значи дека не може да ги исполни своите договорни обврски поради настани надвор од неговата контрола.
„Porsche“ користи алуминиум во деловите на каросеријата на сите серии на возила и е изложен на ризик со тоа што го купува од овој добавувач. Компанијата не сакаше да прецизира за кој добавувач на легура станува збор.
Производителот на алуминиум „Constellium“, кој котира на американската берза, но со седиште во Франција, предупреди на почетокот од јули за поплавени објекти во Швајцарија. А американски „Novelis“ наводно ја затворила својата швајцарска фабрика поради поплави.
И „Constellium“ и „Novelis“ го наведуваат „Porsche“ како купувачи. Ниту една компанија не сакала да ги коментира информациите на „Novelis“ или била достапна за одговор, забележува Reuters.
Поради поплавените капацитети на добавувачите на алуминиум, „Porsche“ сега очекува приход во опсег од 39 до 40 милијарди евра оваа година. Досега се проценуваше на 40 до 42 милијарди евра.
Менаџментот напоменува дека до крајот на годината најверојатно нема да можат целосно да ги надоместат доцнењата во производството и испораките.
