Продажбата на паметните телефони iPhone на американскиот технолошки гигант „Apple“ во Кина паднала дури за 30 отсто во првата седмица од новата година, десет пати повеќе отколку во целата 2023 година, покажаа податоците на „Jefferies“, што укажува на поострата конкуренција на пазарот на азискиот економски џин.
Падот на продажбата на американската технолошка компанија беше главниот двигател на вкупниот двоцифрен пад на испораките на паметни телефони во Кина во првата седмица од новата година, се вели во белешката на споменатата брокерска куќа.
Брендовите со оперативниот систем Android и Huawei не забележаа значителни промени во споредба со истиот период минатата година, откриваат во анализата од „Jefferies“.
Продажбата на „Apple“ потона и покрај агресивното намалување на цените на неколку модели на iPhone на големите кинески платформи за електронско тргување, вклучувајќи го и Pinduoduo, каде што iPhone 15 Pro и iPhone 15 Pro Max беа понудени со попуст од 16 проценти во првата седмица од новата година.
Падот од 30 проценти претставува значително забрзување од цела 2023 година, кога продажбата на „Apple“ на третиот по големина пазар на компанијата падна за 3 процента, велат од „Jefferies“, додавајќи дека го пресметале процентот врз основа на сопствените податоци.
Падот од три процента во 2023 година одговара на падот од 0,4 проценти на пазарниот удел на „Apple“.
Аналитичарите во „Jefferies“ го објаснуваат падот на продажбата на „Apple“ главно на конкурентските притисоци од кинеските ривали, особено „Huawei“, кој во август минатата година лансираше нова серија телефони Mate 60 со сопствен чип, шпекулираат аналитичарите.
И од „Apple“ и од „Huawei“ не одговориле веднаш на барањето на Reuters за коментар за проценките.
Се смета дека линијата Mate 60 го означува враќањето на „Huawei“ на пазарот на мобилни телефони од високата класа по долгогодишните проблеми со американските санкции. Во четвртиот квартал од 2023 година, уделот на „Huawei“ на кинескиот пазар на мобилни телефони порасна за околу 6 отсто, се вели во белешката.
Според аналитичарите на „Jefferies“, „Apple“ најверојатно ќе се соочи со поголем конкурентен притисок од кинеските ривали во 2024 година. Испораките на „Apple“ ќе продолжат да се намалуваат оваа година со двоцифрена стапка, предвидуваат тие, додека „Huawei“ се очекува да го зголеми уделот на пазарот.
Тие проценуваат дека „Huawei“ ќе испорача приближно 64 милиони паметни телефони ширум светот во 2024 година, што е значително повеќе од проценетите нешто помалку од 35 милиони во текот на претходната 2023 година.
