Јужнокорејскиот суд му го продолжи притворот на претседателот Јун Сук-Јеол за дополнителни 20 дена, наведувајќи ја загриженоста дека тој би можел да уништи докази во кривична истрага за неговото краткотрајно прогласување вонредна состојба во земјата на почетокот на декември.
Јун во средата стана првиот актуелен претседател на Јужна Кореја кој беше уапсен под обвинение за бунт. Имајќи обврска или да побараат подолг притвор или да го ослободат претседателот во рок од 48 часа, јужнокорејските истражители побараа во петокот од судот во Сеул да му го продолжи притворот откако претседателот одби сослушување.
Судот соопшти дека ја одобрил наредбата за притвор што ја барала Канцеларијата за истраги за корупција (CIО). Причината за одобрението е „загриженост дека осомничениот може да уништи докази“, се вели во соопштението на судот во саботата.
Според новата наредба, Јун може да остане во притвор до 20 дена.
Откако слушнаа дека притворот на Јун е продолжен, некои од поддржувачите на Јун упаднаа во судницата ноќта кон неделата по локално време, уништувајќи инвентар, нападнаа полицајци и извикувајќи го името на претседателот, објави новинската агенција Yonhap.
Снимките покажуваат дека голем контингент полиција се обидува да ги потисне демонстрантите кои влегоа во зградата.
Досега Јун одбиваше да биде испрашуван од CIO, а не се знае дали ќе ја смени својата позиција за време на неговиот продолжен притвор.
Бунтот, злосторството за кое Јун може да биде казнет, е едно од ретките од кои јужнокорејски претседател нема имунитет.
Јужна Кореја се справува со својата најсериозна политичка криза во последните децении, предизвикана од краткиот обид на Јун да воведе вонредна состојба на 3 декември, која беше отфрлена од парламентот. Пратениците гласаа за негово отповикување на 14 декември, суспендирајќи ги неговите претседателски овластувања.
