Министерот за внатрешни работи на Србија Ивица Дачиќ изјави дека во Белград е уапсено уште едно лице под сомнение за терористичко здружување, јави МИА од Белград.
-Во Белград е уапсено уште едно лице осомничено за терористичко здружување. Станува збор за лице од Белград, родено 1999 година, кое веќе беше уапсено пред две години бидејќи бил администратор на неколку милитантни групи на Интернет кои повикувале на џихад, соопшти Дачиќ.
Додаде дека тој продолжил да комуницира со екстремисти, така што имал секојдневна комуникација со денеска убиениот терорист (Салахудин), поради што се сомнева дека директно учествувал во логистичката поддршка и организација на овој терористички чин. Полициската акција продолжува на повеќе локации во Србија, изјави Дачиќ.
Претседателот на Србија Александар Вучиќ посочи дека се уште се трага по неколку лица.
-Едно лице не ни е достапно, но знаеме дека е на територијата на Србија. Се водел по истите принципи како и Салахудин. Ги следеле и за седум-осум дена требало да бидат уапсени, толку време му требало на обвинителот да ги собере сите докази, но очигледно е дека тие почнале порано, рече Вучиќ.
Тој наведе дека секој има право да ја избере својата вера, но дека извршителите на овој напад се приклучиле на екстремистичките кругови.
-Следени се по линија – индикативни на тероризам, се знаеше дека еден од нив (главниот терорист) дошол да ја посети мајка си, но после тоа се изгубила можноста за следење, заклучи претседателот на Србија.
