Работилница „Како до сопствен бизнис“, на која предавачи ќе бидат стручни лица од НВО „Линк Акросс“ ќе се одржи во среда од 11 часот во просториите на Општина Аеродром.Ова е трета по ред работилница, на која ќе се разгледува можното позиционирање на пазарот и буџетирањето, а потоа учесничките ќе поставуваат прашања што треба да ги доведат до вистинска одлука.
Претходно, во рамки на проектот „Инспирирај – ние сме жени лидерки во нашите заедници“, се одржаа две работилници, од кои на првото предавање на присутните жени им се објаснија основите на претприемништвото, а предавач беше Виолета Манчевска, додека на второто предавање заинтересираните жени беа запознати со активните мерки и програми што Владата на Република Македонија преку Агенцијата за вработување им ги нуди на жените со цел да се намали невработеноста.
Проектот е финансиран од организацијата на жени на Обединетите нации (UN Women), а го спроведува Македонско женско лоби во соработка со Евробалкан и неколку други невладини организации.
Целта на овој проект е преку процес на менторирање да се поддржат активностите на Комисиите за еднакви можности во 22 општини, меѓу кои и Општина Аеродром, а активностите во Општина Аеродром се насочени кон отворање Центар за ран детски развој во Долно Лисиче, како и поддршка на мајките за вработување и самовработување.
1.7.2014
Општина Аеродром
