Рускиот претседател Владимир Путин во вторникот оствари видео-повик со кинескиот претседател Кси Џинпинг во кој тој предложи натамошно развивање на нивното стратешко партнерство само неколку часа откако Доналд Трамп положи заклетва како 47-ми претседател на САД.
Путин му мавна на Кси, обраќајќи му се како „драг пријател“ и рече дека сака да ги претстави „новите планови за развој на руско-кинеското сеопфатно партнерство и стратешка соработка“.
Кремљ објави видео од нивната средба.
„Се согласувам со вас дека соработката меѓу Москва и Пекинг се заснова на широко заедништво на националните интереси и сличност на ставовите за тоа какви треба да бидат односите меѓу големите сили“, му вели Путин на Кси.
„Ние ги градиме нашите односи врз основа на пријателство, заемна доверба и поддршка, еднаквост и заемна корист. Овие односи се самодоволни и не зависат од домашните политички фактори и актуелната глобална ситуација“, рече рускиот претседател.
Кси одговори дека двете страни треба да продолжат да ја продлабочуваат стратешката соработка, цврсто да се поддржуваат меѓусебно, да ги штитат легитимните интереси на двете земји, да ги консолидираат и прошират билатералните односи и да ја унапредуваат практичната соработка.
Русија, која води војна против украинските сили поддржани од НАТО, и Кина, под притисок на американските напори да се спротивстават на нејзината растечка воена и економска моќ, сè повеќе наоѓаат заеднички геополитички цели.
Путин и Кси, кои се спротивставија на она што тие го гледаат како нивно омаловажување од страна на Западот по распадот на Советскиот сојуз во 1991 година и вековната европска колонијална доминација на Кина, се обидуваат да го прикажат Западот како декадентен и во пропаѓања и на морален план.
Соединетите држави ја сметаат Кина за свој најголем конкурент, а Русија за најголема закана за националната држава. Поранешниот американски претседател Џо Бајден рече дека светските демократии се соочуваат со предизвик од „автократиите“ како Кина и Русија.
