Рускиот претседател Владимир Путин ја бранеше политиката на исселување на украинските деца од областите погодени од војната и ги отфрли обвинувањата дека таа практика е нелегална.
„Ги исселувавме од зоната на конфликтот, им ги спасувавме животите – тоа е она што се случува“, рече Путин во саботата за време на состанокот со група африкански лидери во Санкт Петербург. Тој додаде дека „никој нема намера да ги одвои децата од нивните семејства“.
„Евакуиравме цели сиропиталишта и тоа го направивме апсолутно легално бидејќи раководителите на овие сиропиталишта беа нивни легални претставници“, рече Путин.
„Никогаш не бевме против децата да се соберат со своите семејства, доколку, се разбира, се појават нивните роднини. Немаше никакви пречки, и, нормално, нема да има. Можам да ве уверам во тоа“.
Во март, Меѓународниот кривичен суд издаде налози за апсење на Путин и руската комесарка за правата на децата Марија Лвова-Белова под обвинение за „незаконско депортирање и трансфер“ на деца од Украина. Русија го нема ратификувано Римскиот статут (основачкиот документ) на Меѓународниот кривичен суд, и затоа не ја признава јурисдикцијата на судот со седиште во Хаг.
Лвова-Белова во април рече дека многу деца биле сместени во руски летни кампови и одморалишта на барање на нивните семејства.
„Тие беа преместени доброволно затоа што нивните родители побараа безбеден простор каде што децата би можеле да го продолжат своето образование“, рече официјалниот претставник. Таа додаде дека и покрај некои одложувања, малолетниците редовно се спојувале со своите роднини кога доаѓале да ги земат.
