Русија нема интерес да ги нападне Полска или Латвија, изјави рускиот претседател Владимир Путин во своето прво интервју за некој западни медиуми откако Русија започна инвазија на Украина, од кое инсерти беа емитувани пред прикажувањето на интегралниот разговор.
Путин разговараше со американскиот конзервативен телевизиски водител Такер Карлсон и рече дека Русија не сака никакво проширување на војната која моментално е во границите на Украина.
„Глобална војна не доаѓа предвид. Ова е во спротивност со здравиот разум, бидејќи таквата војна ќе го доведе човештвото на работ на уништување. Исто така, Русија нема никакви интереси во Полска, Латвија или никаде. Можеме да возвратиме само во еден случај, а тоа е ако дојде до напад врз Русија од, на пример, Полска“, рече Путин.
„Порано или подоцна Русија и Украина ќе се договорат. Јас лично сакам оваа ситуација да се реши со преговори. Русија сѐ уште не ги постигнала целите поставени со оваа специјална воена операција. Западот почна да сфаќа дека е невозможно стратешки да се победи Русија. Сега е време да размислите како и што понатаму. Подготвени сме за дијалог“, рече Путин и нагласи дека неговата земја и покрај сите санкции со кои се соочи, „стана најсилната европска економија во 2023 година, а петта во светот“.
Путин се осврна и на Соединетите држави и додаде дека верува во обновување на комуникацијата.
„Тоа ќе се случи ако САД се навикнат дека светот се менува. Треба да се прилагодат на новиот свет и новите односи на моќ. Имав навистина добри односи со некои од претходните американски претседатели. Пред сѐ, мислам на Џорџ Буш помладиот, кој многумина го потценија, но беше многу добар. Сфажаше многу и добро работеше. Имав сличен однос и со Доналд Трамп. Но, повторувам, ако идејата за доминација остане по секоја цена во американската јавност, ништо нема да се промени“, рече Путин и додаде дека на сите им е јасно дека „Американците го уништија гасоводот Северен тек“.
