Рускиот претседател Владимир Путин во петокот рече дека тој и Доналд Трамп би требало да се сретнат за да разговараат за војната во Украина и цените на енергенсите, прашања што американскиот претседател ги истакна во првите пет дена од неговата нова администрација.
Путин во изјавата за телевизискиот канал Россия 1, сепак, рече дека не може да има сериозни мировни преговори со Украина, освен ако Западот не го притисне претседателот Володимир Зеленски за да го поништи декретот од 2022 година со кој му се забранува да преговара со рускиот лидер.
„Отсекогаш велевме, сакам уште еднаш да нагласам: подготвени сме за овие преговори за украинското прашање, но и тука има прашања кои бараат посебно внимание. На пример, како што е познато, актуелниот шеф на режимот во Киев, кога сè уште беше прилично легитимен шеф на државата, издаде декрет за забрана на преговорите“, рече Путин алудирајќи на тоа што минатата година истече претседателскиот мандат на Зеленски.
Путин го опиша Трамп, кој оваа седмица ѝ се закани на Русија со нови санкции и царини доколку не преговара за крај на војната, како „паметен и прагматичен“. Тој рече дека не очекува американскиот претседател да носи одлуки за санкции кои би влијаеле на американската економија.
„Затоа, најверојатно ќе биде подобро за нас да се сретнеме, врз основа на денешните реалности, мирно да разговараме за сите оние области важни за САД и за Русија. Ние сме подготвени“, рече Путин додавајќи дека тоа зависи од избор на американската страна.
Агенцијата Reuters оценува дека ова е најсилниот показател досега од Кремљ дека посакува скорешен самит со Трамп по трите години практично никаков контакт на високо ниво со западните челници поради војната во Украина.
Путин рече дека отсекогаш имал „прагматичен, доверлив однос“ со Трамп. Тој, исто така, изрази поддршка за тврдењето на Трамп дека тој а не Џо Бајден е вистинскиот победник на американските избори во 2020 година.
„Не можам да не се согласувам со него дека ако беше избран за претседател, ако не му беше украдена победата во 2020 година, тогаш можеби немаше да има криза во Украина што се појави во 2022 година“, рече лидерот на Кремљ.
Откако во декември 2021 година НАТО и САД експресно ја отфрлија понудата од Москва да се одржи самит на кој ќе се разговара за безбедносните закани за Русија и постигнување сеопфатен безбедносен договор кој нема да биде на штета на трети земји, во февруари следната година Русија ја започна, како што ја нарекува својата „специјална воена операција“ во Украина. Како што и претходно објаснуваше Путин, нејзината цел е да се заштити мнозинското руско и рускојазично население во југоистона Украина од плановите на Киев да направи етничко чистење на тие простори, да ја демолитаризира и денацизира соседната земја да не биде закана за руската безбедност.
