Рускиот претседател Владимир Путин изјави дека тврдењето на американскиот претседател Џо Бајден дека Русија ќе нападне земја на НАТО доколку победи во Украина е целосна глупост, а за влезот на Финска во НАТО рече дека тоа ќе ја принуди Русија да „концентрира одредени воени единици“ на северот во близина на границата.
Во интервјуто емитувано во неделата на руската државна телевизија, Путин додаде дека Русија нема интерес да се бори со НАТО алијансата.
Војната во Украина ја предизвика најдлабоката криза во односите на Москва со Западот од Кубанската ракетна криза во 1962 година, а Бајден минатата година предупреди дека директна конфронтација меѓу НАТО и Русија ќе предизвика Трета светска војна.
Во молбата до републиканците да не ја блокираат понатамошната воена помош претходно овој месец, Бајден предупреди дека ако Путин победи во Украина, Русија ќе нападне земја на НАТО. Бајден не пружи никакави докази за таквите тврдења, забележува агенцијата Reuters.
„Тоа е целосна глупост – и мислам дека претседателот Бајден го сфаќа тоа“, рече Путин.
Додаде дека тоа е обид на Бајден да ја оправда својата „погрешна политика“ кон Русија.
„Русија нема причина, нема интерес – нема геополитички интерес, нема економски, политички и воен – да се бори со земјите од НАТО“, рече рускиот претседател.
НАТО алијансата предводена од САД е основана во 1949 година за воено спротиставување на Западот против тогашниот Советски сојуз. По распадот на Советскиот сојуз во 1991 година, НАТО почна да се проширува на некои земји од поранешниот Варшавски пакт.
Путин постојано го опиша проширувањето на НАТО по Студената војна како доказ за арогантниот начин на Запад да им наштети на руските безбедносни гледишта. Москва вети дека ќе преземе „контрамерки“ откако Финска ќе влезе во НАТО.
Според член 5 од Договорот за НАТО, „страните се согласуваат дека вооружениот напад врз еден или повеќе од нив во Европа или Северна Америка ќе се смета за напад против сите нив“.
На прашањето како да се најде заеднички јазик со Западот со оглед на реториката на двете страни, Путин рече: „Тие ќе мора да најдат заеднички јазик, бидејќи ќе мора да се сметаат со нас“.
Путин рече и дека влегувањето на Финска во НАТО ќе ја принуди Русија да „концентрира одредени воени единици“ во северна Русија во близина на границата со Финска, додавајќи дека со тоа се создадени „проблеми“ таму каде што „ги немаше“.
„Таму немаше проблеми, но сега ќе има, бидејќи ќе го создадеме Ленинградскиот воен округ и таму ќе концентрираме одреден број единици“, рече тој.
Односите меѓу двата соседа, кои ја делат границата од 1.340 километри, значително се влошија од февруари 2022 година и од руската офанзива во Украина, што поранешната власт во Финска го искорити дефинитивно да ја приклучи земјата во НАТО во април 2023 година, наводно загрижена за нејзината безбедност.
„Тие (Западот) ја вовлекоа Финска во НАТО. Дали имавме несогласувања со тоа? Сите спорови, вклучително и територијалниот од средината на 20. век, беа решени многу одамна“, рече тој.
Неговите коментари доаѓаат откако Финска во четвртокот објави дека повторно ја затвора целата своја граница со Русија, неколку часа по повторното отворање на двата гранични премини, обвинувајќи ја Москва за организирање на мигрантската криза.
Хелсинки ја обвинува Москва дека намерно ги пушта мигрантите кон Финска, осудувајќи го „хибридниот напад“ чија цел е дестабилизација на Финска. Кремљ ги отфрли обвинувањата.
