Директорката на домот за деца без родители „11-ти Октомври“ од Скопје, Ристена Атанасова е избркана од работа и оставена на улица, таа е самохрана мајка, порача во неделата на прес-конференција Даниела Рангелова од ВМРО-ДПМНЕ илустрирјаќи го со овој пример, како што посочи, политичкиот прогон кој кон неистомислениците и вработените во јавната администрација го врши СДСМ.
„Бранка Шишовска од Берово, директорка на Центарот за социјални работи, исто така, е избркана од работа и оставена на улица. Бранка Шишовска имаше уште само три години до пензија. Избркана од работа и оставена на улица е и директорката на Центарот за социјални работи Неготино, Роза Јаневска. Катерина Матиќ е самохрана мајка. Беше вработена во Агенцијата за храна и ветеринарство. Сега и избркана и оставена буквално на улица. Весела Честоева има две полнолетни деца. Работеше како раководител на секторот во Археолошкиот музеј. Практично таа го подигна Археолошкиот музеј од неговата преселба во новите простории. Сега и неа ја бркаат од работа и ја оставаат на улица. Ова се само дел од жените кои изминатиов период го осетија камшикот на режимот на СДС“, рече Рангелова.
Истакна и дека ваквиот список е долг, оти десетици жени без никаква основа или аргументација добиваат откази или се деградирани во институциите каде што работат.
„Ваквото однесување е срамно и невидено. Ваквото однесување е одлика на еден фашистички режим. СДС ја спроведува на дело максимата на Зоран Заев ‘на клоци ќе ги бркаме и ќе вработуваме од чистачка до министер’. Режимот на Заев и СДС не го интересира што овие жени кои ги исфрлаат на улица се и мајки, а дел од нив и самите се грижат за сопствените деца. Трагично е тоа што освен што се жени и мајки, истите се докажани професионалци во својата област и немаат буквално никаква црна дамка во нивните кариери. Режимот на Заев и СДС ги деградира и ги девалвира само заради тоа што не се нивни слепи политички послушници“, истакна Рангелова.
Додаде дека според информациите коишто ги имаат во партијата речиси секој кој се вработил во изминатите десет години е под силен притисок и закани по неговото работно место, од страна на новите раководители поставени од СДСМ.
„Бараме под итно да престане овој прогон на вработените во администрацијата кој го врши СДС. Истовремено бараме сите вработени кои биле неосновано и незаконски избркани од работа да бидат заштитени од страна на агенцијата за државни службеници, од трудовиот инспекторат, од комисијата против дискриминација, од судовите. Не смее да молчи и да замижува ниту Народниот правобранител. Негова обврска е да ги брани интересите на граѓаните пред режимот на Заев. Истовремено очекуваме и канцеларијата на Европската Унија да реагира на ваквото кукавичко однесување на СДС и бруталното отпуштање на професионалци и на нивно место вработување на партиски војници, разноразни комичари, шарени револуционери, поети, твитер ликови и слично“, заклучи Рангелова.
