На Волстрит во понеделникот индексот S&P 500 падна поради притисокот врз технолошкиот сектор, додека Dow Jones порасна, најмногу благодарение на растот на цените на акциите во енергетскиот сектор.
Индексот Dow Jones зајакна 0,67 отсто, на 39.411 поени, но S&P 500 се лизна за 0,31 отсто, на 5.447 поени, а Nasdaq 1,09 отсто, на 17.496 поени.
Падот на индексите S&P и Nasdaq е последица на надолната корекција на цените на акциите на технолошките гиганти, особено на производителите на чипови. Дел од инвеститорите решија, се чини, да повлечат дел од заработката од тој сектор по силниот раст минатата седмица.
Меѓу најголемите губитници беше акцијата на „Nvidia“, чија цена падна за 13 отсто во последните три дена. Минатата седмица пазарната вредност на производителот на чипови надмина 3.200 милијарди долари, па „Nvidia“ накратко стана најголемата светска компанија по пазарна капитализација, престигнувајќи го „Microsoft“. Сепак, од средината на минатата седмица оваа акција, како и целиот сектор на производители на чипови, се под притисок.
И додека технолошкиот сектор вчера падна, цените на акциите во повеќето други сектори пораснаа. Меѓу најголемите добитници беше енергетскиот сектор, благодарение на поскапувањето на нафтата во последните денови. Поради оваа причина, меѓу другото, индексот Dow Jones вчера порасна петти ден по ред и го достигна највисокото ниво за еден месец.
„Последниве денови видовме ротација од технолошкиот сектор кон некои други сектори кои заостанаа во однос на растот, како што се финансискиот, енергетскиот и услужниот сектор. Растот на енергетскиот сектор дополнително е потпомогнат од растот на цената на нафтата“, објаснува Ед Клисолд, стратег во компанијата „Ned Davis Research“.
На европските берзи цените на акциите вчера пораснаа. Лондонскиот FTSE индекс зајакна за 0,53 отсто, на 8.281 поен, додека франкфуртски DAX порасна за 0,89 отсто, на 18.325 поени, а париски CAC зајакна за 1,03 отсто, на 7.706 поени.
