На Волстрит во четвртокот индексот S&P 500 значително порасна втор ден по ред, како и Nasdaq, откако американската централна банка ги намали каматните стапки за 0,25 процентни поени.
Индексот Dow Jones остана речиси непроменет, на 43.729 поени, додека S&P 500 порасна за 0,74 отсто, на 5.973 поени, а Nasdaq индексот порасна за 1,51 отсто, на 19.269 поени.
Нови рекорди за S&P 500 и Nasdaq индексот следеа откако челниците на Fed одлучија на нивната редовна седница, очекувано, да ги намалат клучните каматни стапки за 0,25 процентни поени, во опсегот од 4,50 до 4,75 отсто.
Пазарот на труд благо ослабел, стапката на невработеност е на ниски нивоа, додека економијата солидно расте, а инфлацијата се лизга кон целното ниво од 2 отсто, се вели во соопштението на Fed.
„Во оваа возбудлива седмица, Fed не придонесе за драмата бидејќи таков потег беше очекуван. И покрај намалувањето од 0,25 процентни поени, каматните стапки остануваат рестриктивни, но не толку строги како порано“, вели Брајан Јакобсен, економист во „Annex Wealth Management“.
Така, S&P 500 и Nasdaq индексите продолжија да растат, откако претходниот ден скокнаа за повеќе од 2,5 отсто, благодарение на победата на Доналд Трамп на претседателските избори во САД.
На пазарите се очекува новостариот претседател да води протекционистичка економска политика, како и во претходниот мандат, да ги намали даноците и да спроведе дерегулација во различни области.
„Изборите ќе имаат одредени последици, така што верувам дека ќе има мало подобрување на економскиот раст во однос на сегашните проценки, но и мало зајакнување на инфлацијата. И ова може да значи дека Fed ќе ги намали каматните стапки побавно од очекуваното“, вели Брајан Јакобсен.
И на повеќето европски берзи цените на акциите вчера пораснаа. Додуша, лондонскиот FTSE индекс ослабе за 0,32 отсто, на 8.140 поени, но франкфуртски DAX скокна за 1,70 отсто, на 19.362 поени, а париски CAC 0,76 отсто, на 7.425 поени.
