Цените на акциите силно пораснаа на Волстрит во вторникот, по добрите економски показатели, но аналитичарите очекуваат нестабилно тргување во наредните денови, бидејќи се чекаат резултатите од претседателските избори во САД.
Индексот Dow Jones зајакна 1,02 отсто, на 42.221 поени, додека S&P 500 порасна за 1,23 отсто, на 5.782 поени, а индексот Nasdaq 1,43 отсто, на 18.439 поени.
Најмногу вчера пораснаа цените на акциите во индустрискиот и трговскиот сектор, за повеќе од 1,6 отсто, откако беа објавени подобри од очекуваните економски показатели.
Индексот на активност на ISM во услужниот сектор во октомври се искачи на 56 поени, највисоко ниво од средината на 2022 година, додека аналитичарите очекуваа пад на индексот во однос на претходниот месец. Овој податок покажува дека најголемата светска економија продолжува да расте.
Инвеститорите се фокусирани на претседателските избори во САД, во кои имаше тесна трка меѓу демократската кандидатка Камала Харис и републиканскиот кандидат Доналд Трамп. Шансите на Трамп се подобрија вчера кај обложувалниците.
„Пазарот се обидува да го погоди исходот од изборите. Но, анкетите укажуваат на тесна трка, така што инвеститорите маргинално се позиционираат за еден или друг резултат“, вели Роб Хаворт, стратег во „U.S. Bank Wealth Management“, кој очекува нестабилно тргување во наредните денови.
И на повеќето европски берзи цените на акциите вчера пораснаа. Додуша, лондонскиот FTSE индекс ослабе за 0,14 отсто, на 8.172 поени, но франкфуртски DAX порасна за 0,57 отсто, на 19.256 поени, а париски CAC за 0,48 отсто, на 7.407 поени.
