Министерката за труд Дарија Кисиќ Тепавчевиќ, по седницата на Кризниот штаб, чиј член е, изјави дека во Србија има мало зголемување на бројот на заболени, но дека ситуацијата сепак и понатаму е стабилна, јави дописникот на МИА од Белград.
– Кога станува збор за хоспитализирани пациенти последните месеци, над 99 отсто од нив не биле вакцинирани, а меѓу оние кои починале како резултат на инфекцијата нема такви кои биле целосно имунизирани, изјави Кисиќ Тепавчевиќ.
Таа додаде дека најголемиот дел од состанокот бил посветен на тоа како да се влијае на зголемувањето на опфатот со вакцинација и дека тоа не е само индивидуална одговорност, туку и колективна.
– Ние не се штитиме само себеси, туку и оние што ги сакаме, рече Кисиќ Тепавчевиќ.
До денеска, во Србија се вакцинирани 2.772.927 лица, а 2.642.507 лица ги примиле двете дози. Околу 49 отсто од српските граѓани примиле барем една доза вакцина, а Кисиќ Тепавчевиќ посочи дека овој процент не е доволен.
Таа изјави дека е особено поразителен фактот дека само 17,42 отсто од населението на возраст од 18 до 30 години е имунизирано.
– Младите мора да разберат дека можат и да се разболат, дека најверојатно нема да имаат потешка форма на болест, но тие го носат овој вирус и можат да го пренесат на други, рече Кисиќ Тепавчевиќ.
Одговарајќи на прашање во врска со третата доза, министерката изјави дека сите што биле вакцинирани двапати, сигурно ќе одат да ја примат третата доза доколку се покаже дека е неопходна, но предупреди дека сега приоритет е вакцинирање на невакцинирани лица за стекнување колективен имунитет.
Според неа, истражувањето за третата доза сè уште се прави, како и дека сега тоа го прават производителите и посочи дека е докажано дека имунитетот по вакцинацијата трае подолго отколку што првично се сметаше.
Таа посочи дека не биле забележани голем број заразени лица кои претходно биле вакцинирани и дека оние кои биле заразени и биле вакцинирани немале потешки форми на болеста.
Во врска со информациите дека некои клинички центри бараат ПЦР тестови од вработените кои не биле вакцинирани при враќање од годишен одмор и прашањето дали тоа е пракса во сите болници, таа одговори дека една од мерките што може да се преземе индивидуално, од болницата до болница, во зависност од епидемиолошката состојба, е од вработените по одморот да може да се побара доказ дека не се заразени.
– На седницата на Кризниот штаб беше констатирано дека повеќе од 30 отсто од луѓето не носат заштитни маски и не одржуваат растојание, рече Кисиќ Тепавчевиќ, најавувајќи дека во следниот период ќе бидат засилени контролите за почитување на мерките.
