Илјадници мигранти преминаа во САД во последните денови, од Калифорнија до Тексас, а многу други пристигнуваат со автобуси и товарни возови во мексиканските погранични градови по рекордните миграциски текови понатаму на југ, што претставува нов предизвик за американскиот претседател Џо Бајден.
Драматичното зголемување долж границата – особено во Сан Диего, во сојузната држава Калифорнија, и во тексашките градови Ел Пасо и Игл Пас, означува пресвртница откако бројките драстично паднаа во последниве месеци и може да создаде нови политички проблеми за Бајден да ја оствари својата намера да оди на изборите за вториот мандат следната година.
Во мај, Бајден започна нови политики за да ги спречи илегалните преминувања, вклучително и депортирањето мигранти и забрана за повторен влез на пет години, додека неговата администрација се справуваше со рекордната миграција. За еден месец построгите мерки ја намалија стапката на минување на границата за околу 70 отсто.
Но, неодамнешниот пораст на пристигнувања на границата, во комбинација со значително повеќе луѓе кои се упатуваат кон север преку Централна и Јужна Америка, опасно патувајќи со товарните возови низ Мексико, сугерира дека одвраќањето слабее.
Експертите велат дека САД немаат капацитет да ги приведат и обработуваат мигрантите на границата, што често ја оневозможува администрацијата да ги спроведе строгите казни што ги објави во мај. Како резултат на тоа, некои баратели на азил кои нелегално преминуваат се пуштени во САД со иден датум на судење, наместо да бидат депортирани.
„(Администрацијата на Бајден) излезе со паметна стратегија, но нема ресурси или капацитет да ја спроведе“, вели Ендрју Селе, директор на Институтот за миграциска политика.
Како одговор на прашањата на агенцијата Reuters, Царинска и гранична служба на САД (CBP) соопшти дека ги обработува мигрантите „безбедно и ефикасно“ и ќе наметне последици, вклучително и депортација, за мигрантите без правна основа да останат во земјата.
