Стечајот може да заврши со задржување на вработените и продолжување на работата на капацитетот, како што беше со ФЕНИ, овој модел ќе се обидеме да го примениме и на „Еурокомпозит“, наместо долгиот процес за приватизација, истакна во средата вицепремиерот за економски прашања, Кочо Анѓушев одговарајќи на новинарски прашања.
Тој лично, како што рече Анѓушев, е оптимист дека прилепскиот наменски комбинат „Еурокомпозит“ за краток период ќе продолжи со работа.
„Еурокомпозит е долги години блокиран, но му помогнавме да продолжи со работа што не е, ниту смее да биде трајно решение. Компанијата треба да се приватизира, но во транспарентна постапка, а за тоа има два начина, или објавување тендер или наоѓање инвеститор за целосна реорганизација како што беше со ФЕНИ„, напомена Анѓушев.
Стечајот, подвлече вицепремиерот, покажува резултат само ако имате чесни намери и капацитет да го спроведете.
„Ако најдеме разбирање со инвеститори што се заинтересирани, а со такви неколку веќе разговаравме, за да не го чекаме долгиот период за приватизација, можеме да го примениме и вториот законски модел за санирање на состојбата“, тврдеше Анѓушев.
Со одлуката на Владата од седницата во вторникот, „Еурокомпозит“ треба да побара позајмица од 11 милиони денари, и тоа шест милиони денари од АД ЕЛЕМ и пет милиони денари од АД МЕПСО. Со тие пари на вработените ќе им бидат исплатени по две плати, наместо по една како што беше најавено по прекинот на нивниот штрајк минатата седмица.
На вработените во „Еурокомпозит“, чии загуби се проценуваат на пет милиони евра, не им се исплатени 18 плати и придонеси за изминатите шест години.
