Светскиот рекет број 4 Каспер Руд од Норвешка се квалификуваше за своето второ последователно финале на Ролан Гарос победувајќи го 27-то на АТП рангирањето, Германецот Александар Зверев во полуфиналето со 6-3, 6-4, 6-0.
Во неделното финале Руд ќе се соочи со Србинот Новак Ѓоковиќ, кој ќе се обиде да стане првиот човек кој освоил 23 Грен слем титули. Ѓоковиќ го совлада моментално светскиот играч број еден, Шпанецот Карлос Алкараз, кој имаше проблеми со грчеви во последните два сета со 6-3, 5-7, 6-1, 6-1.
Во вториот полуфинален меч Руд доминираше во три сета против високиот Германец и го совлада по два часа и девет минути игра. Скандинавецот уште од самиот почеток ги држеше во раце сите конци на играта, а во последниот сет му подари „велосипед“ на бледиот Зверев.
Руд го победи Швеѓанецот Елиас Имер во првото коло, Италијанецот Џулио Зепиери во второто коло, Кинезот Џанг Жижен во третото, Чилеанецот Николас Жари во осминафиналето и Данецот Холгер Руне во четвртфиналето.
Норвежанецот така по трет пат стигна до финалето на Грен слем, а вторпат по ред ќе игра во големото финале на Ролан Гарос. Руд минатата година во финалето на Париз беше поразен од Рафа Надал, а сега ќе игра против Ѓоковиќ, кој го победи на сите четири натпревари. Уште полошо за Руд е што не освои ниту сет во тие четири обиди.
Ѓоковиќ, инаку, стана првиот тенисер по бројот настапи во финалето на Грен слем турнирите, а в недела ќе се појави по 34-ти пат. Во минатото само Американецот Крис Еверт има 34 финалиња на грен слем, Серена Вилијамс има 33, а Мартина Навратилова има 32 финални настапи. Швајцарецот Роџер Федерер и Германката Штефи Граф одиграа по 31 финале, додека Шпанецот Рафаел Надал 30 пати се појави во финалињата на турнирите од највисоко ниво.
