Португалскиот 37-годишен фудбалски мајстор Кристијано Роналдо беше официјално претставен во вторникот во Ријад, откако потпиша договор за саудискиот клуб Ал Наср.
Саудиска Арабија е потресена од „Роналдоманија“ по објавувањето на неговото доаѓање во Ал Наср. Клубот добил околу 130.000 барања на навивачи за билети за презентацијата на Роналдо на стадионот „Мрсоол Парк“. Сепак, само 25.000 од нив имале среќа да купат билет кој чинел четири долари, а целиот приход ќе оди во хуманитарни цели.
По главните сообраќајници во Ријад се појавија транспаренти со пораката „Хала (добредојде) Роналдо“, а навивачите се редат во огромни редици за да го купат дресот на Ал Наср со името на португалската ѕвезда и неговиот иконски број N.7.
„Азија никогаш не видела вакво нешто“, објави Gulf News. „Каде и да оди, ќе привлекува внимание и ако само 10 отсто од неговите следбеници се заинтересирани за неговиот нов клуб, судиската лига ќе стане една од најгледаните во светот“, пишува весникот.
„Во Европа мојата работа е завршена. Освоив сѐ, играв во најважните клубови. Се чувствувам одлично, ова не е крај на мојата кариера”, изјави Роналдо на прес-конференција и додаде дека добил многу понуди во Европа и од Бразил, но дека им дал „збор“ на челниците на неговиот нов клуб и дека сака да ја искористи „шансата“ да се развие во Азија.
„Благодарен сум на Ал Наср што ми ја даде оваа можност да го развивам фудбалот за помладите генерации, исто така, и за жените. Тоа е предизвик за мене, но исто така се чувствувам среќен и горд“, додаде тој, отфрлајќи ги критиките за неговиот преминување во Саудиска Арабија. „Јас сум уникатен играч, тоа е нормално за мене“, додаде.
Роналдо потпиша договор со Ал Наср до јуни 2025 година, а се шпекулира дека ќе заработува околу 200 милиони евра по сезона.
„Пред мене е нов предизвик во Азија. Мило ми е што сум тука. Вчерашниот пречек беше фантастичен, Саудиска Арабија прекрасно ме пречека“, додаде Португалецот кој донесе голем тим асистенти, па дури и приватна компанија за обезбедување во Ријад. .
По средбата со новинарите, Роналдо им беше претставен на навивачите, кои го поздравија со овации.
„Ќе го прославиме доаѓањето на Роналдо, а потоа ќе продолжиме да работиме на други засилувања“, рече еден функционер на клубот, велејќи дека Ал Наср сака да формира „нови Галактикос“, што се однесува на Реал Мадрид во 2000-тите и нивниот тогашен состав преполн со ѕвезди. од Португалецот Луис Фиго до Англичанецот Дејвид Бекам, преку Бразилецот Роналдо и Французинот Зинедин Зидан.
„Наскоро ќе ги поддржиме другите наши клубови за квалитетни договори со меѓународни ѕвезди“, рече Абдулазиз бин Турки ал-Фајсал, министер за спорт на земјата.
Доаѓањето на Роналдо го поздрави и тренерот на Ал Наср, Руди Гарсија.
„Да се потпише играч со величина на Кристијано Роналдо е извонредно и придонесува за развојот на саудискиот фудбал“, изјави Гарсија, кој претходно ги водеше Лил, Рома, Марсеј и Лион.
„Среќни сме поради неговото доаѓање. Се надевам дека ќе ужива играјќи за Ал Наср и ќе ги забавува навивачите“, додаде францускиот стручњак.
Роналдо е убедливо најголемата ѕвезда којашто пристигнала во Саудиска Арабија, иако други фудбалски мајстори, вклучувајќи ги Џорџ Веа, Пеп Гвардиола и Чави, исто така играа во оваа блискоисточна земја.
Деветкратниот шампион на саудиската лига го нарече потпишувањето со Роналдо „повеќе од историјата во создавањето“, тврдејќи дека тој ќе го инспирира остатокот од лигата, па дури и државата.
Манчестер Јунајтед го раскина договорот со Роналдо за време на Светското првенство по неговото експлозивно интервју во кое тој рече дека се чувствува „предаден“ од клубот и дека нема почит кон тренерот Ерик тен Хејг.
Роналдо освои пет титули во Лигата на шампионите, шампионски титули во Италија со Јувентус, во Шпанија со Реал Мадрид и во Англија со Манчестер Јунајтед.
Исто така, тој е најдобриот стрелец во историјата на Лигата на шампионите и на португалската репрезентација со која го освои Европското првенство во 2016 година.
На светското првенсто во Катар стана првиот играч во историјата кој постигнал погодок на пет светски првенства.
