Напаѓач избодел до смрт маж во холандскиот пристанишен град Ротердам во текот на ноќта кон петокот пред да биде совладан од полицијата и случајните минувачи, соопшти полицијата.
Во инцидентот е повредено уште едно лице, а при совладувањето и апсењето бил повреден и осомничениот напаѓач.
Очевидци изјавија за холандската телевизија NOS дека осомничениот извикал „Алаху екбер“ („Господ е голем“ на арапски) за време на нападот. Полицијата не го потврди ова, но соопшти дека го истражува мотивот за нападот.
„Еден 32-годишен локален маж е убиен, соопшти полицијата во петокот. Случајни минувачи и полициски службеници го совладале и привеле пријавениот“, се вели во полициското соопштение.
Весникот De Telegraaf објави дека случаен минувач, личен тренер кој водил тренинг на отворено, го удрил осомничениот со стап додека другите случајни минувачи фрлале со столови по него.
Осомничениот и преживеаната жртва, 33-годишен швајцарски државјанин, се пренесени на лекување во болница.
Осомничениот е 22-годишник од Амерсфорт, град на околу 80 километри од Ротердам.
Според извештаите на локалните медиуми, осомничениот ја избодел својата прва жртва во паркинг гаража под мостот Еразмусбруг во Ротердам пред да се качи на улицата, каде фатално нападнал друго лице.
Очевидци изјавија дека напаѓачот носел два големи ножа и напаѓал луѓе по случаен избор.
