Владата на последната седница во Куманово донесе Одлука за едностран раскин на договорот за концесија за експлоатација на минерална суровина – руди на бакар и злато на локалитетот Иловица, во општина Босилово.
„Со оваа одлука Договорот за концесија за експлоатација на минерална суровина – руди на бакар и злато на локалитетот “с. Иловица”, општина Босилово од 2014 година и Анекс на Договорот од 2015 година, еднострано се раскинуваат од страна на концедентот, бидејќи концесионерот нема поднесено барање со целокупна неопходна документација за издавање на дозвола за експлоатација на минерални суровини во рок од четири години по склучување на договорот за концесија за експлоатација на минерални суровини“, велат од Владата.
Со денот на влегувањето во сила на оваа одлука престанува да важи и Одлуката за доделување концесија за експлоатација на минерална суровина–руди на бакар и злато на Друштвото за производство, промет и усуги ФЕЛПС ДОЏ ВАРДАР ДООЕЛ Скопје на локалитетот “ с. Иловица”, општина Босилово од 2012 година.
Оваа одлука влегува во сила наредниот ден од денот на објавувањето во “Службен весник на Република Северна Македонијаа“.
Во меѓувреме, концесионерот Еуромакс рисорсис води постапка пред Управниот суд, каде Канаѓаните поднесоа тужба против решението со кое второстепената државна комисија всушност пресече дека тие немаат право да вадат руда на местото каде што се планираше да никне рудникот во Иловица.
Се стравува дека доколку тие решат да ја дадат земјава на Арбитража, ризикуваме да платиме голема сума на пенали доколку пресудата биде на наша штета.
