Руската централна банка во петокот на последната сесија од годината ја задржа основната каматна стапка на 21 отсто, наведувајќи дека неодамнешното заострување на монетарните услови создало предуслови за намалување на стапката на инфлација кон целното ниво.
„Со оглед на значителното зголемување на каматните стапки за должници и смирувањето на кредитната активност, заострувањето на монетарните услови ги создава неопходните предуслови за продолжување на процесот на дезинфлација и враќање на инфлацијата на целното ниво“, соопшти централната банка во изјава за јавноста.
Во јули, Банката на Русија ја зголеми основната стапка за прв пат оваа година за два процентни поени одеднаш – на 18 отсто на годишно ниво – во услови на забрзана инфлација, брз раст на кредитирањето и зголемени инфлациски очекувања. Во септември беше додаден уште еден процентен поен, а во октомври беше зголемен за два, на рекордни 21 отсто годишно. Ова е максималната стапка од нејзиното воведување во 2013 година. Претходниот рекорд беше во февруари 2022 година, кога ставката беше зголемена на 20 проценти.
Одлуката уследи ден откако претседателот Владимир Путин, додека одговарајќи на прашања традиционално директно поставени од руските граѓани преку телефон, јавно повика на „урамнотежена“ одлука на централната банка, која мора да управува со инфлаторните ефекти од префрлањето на економијата на воени услови поради конфликтот во Украина, забележува Reuters.
Инфлацијата во Русија е 9,5 отсто, што е далеку повисока од целта од четири отсто. Централната банка соопшти дека нејзината строга монетарна политика веќе го забавиla кредитирањето и ја пригушила домашната побарувачка, како и дека потребата од евентуално зголемување на каматните стапки ќе ја процени на следната седница закажана за 14-та февруари.
Централната банка е независна со закон, а Путин ѝ даде одврзани раце на гувернерката Елвира Набиулина во минатото, но аналитичарите велат дека притисокот од деловните кругови станал премногу силен за да се игнорира.
Моќните деловни челници се пожалија дека скокот на каматните стапки ги кочи инвестициите, но 23 од 27-те економисти анкетирани од Reuters сепак очекуваа основната каматна стапка да се зголеми на 23 проценти.
„Притисокот… дејствуваше и централната банка одлучи да престане“, рече економистот Евгениј Коган.
Сегашната каматна стапка е сè уште највисока од раните години на доаѓањето на власт на Путин, кога Русија се опоравуваше од економскиот хаос од почетокот на 1990-те.
Путин рече дека западните санкции се, исто така, виновни за високите цени, како и слабата жетва оваа година поради екстремните временски услови во многу земјоделски региони низ Русија, откако цените на основните прехранбени производи како млекото, путерот и зеленчукот се зголемија со двоцифрена стапка. Руската економија годинава би требало да порасне за четири отсто, потсетува Reuters.
