Руската економија порасна втор квартал по ред и покрај високата инфлација и западните санкции кои ја ослабнаа рубљата, покажаа официјалните податоци во средата. Економијата се прошири за 5,5% на годишно ниво во третиот квартал по падот во истиот период минатата година, според федералната агенција за статистика, јавува АФП.
Економијата во Русија се намали во 2022 година, но повторно почна да расте во вториот квартал од годинава, на годишна основа, завршувајќи ја низата од четири последователни квартали на контракција.
Официјални лица прогнозираат дека економијата ќе закрепне во 2023 година, при што Централната банка очекува раст помеѓу 2,2% и 2,7% за целата година. Министерот за економија Максим Решетников рече дека минатата недела годишниот раст треба да достигне 3%.
Русија беше погодена од невидени западни санкции по нејзината воена кампања во Украина. Од тогаш Москва пренасочи голем дел од својот витален извоз на нафта и гас во Кина и Индија и воведе валутни контроли за да ја поддржи рубљата, која останува нестабилна, тргувајќи се по околу 90 рубли за долар.
Претседателот Владимир Путин ги поздрави економските перформанси на Русија наспроти западните санкции.
Но, независните аналитичари велат дека огромното зголемување на воените трошоци, иако ја поддржува економијата, доведува до низа други проблеми. Инфлацијата се зголеми, а невработеноста е на рекордно ниско ниво, што доведе до недостиг на работна сила и постојан нагорен притисок врз цените.
