Прекуграничниот упад на Украина во Русија ги наруши плановите на руските платеници во Буркина Фасо предводена од хунтата, а многумина сега се повлекоа за да помогнат во зајакнувањето на одбраната на Москва дома, изјави Виктор Јермолаев, шеф на паравоената единица позната како Медведи (Мечки).
Во интервју за АФП, Јермолаев, вели дека многу од неговите борци ја напуштиле западноафриканската земја, додека некои останале.
Украина претходно овој месец започна невиден упад во западниот руски регион Курск, додавајќи нов фактор во над двегодишната војна што започна во февруари 2022 година со инвазијата на Москва врз нејзиниот сосед.
Бригадата „Мечки“ е една од неколкуте такви платенички групи што се појавија во последниве години заедно со сега веќе непостоечката „Вагнер“ на покојниот Евгениј Пригожин, а западните аналитичари велат дека се тесно поврзани со руската држава.
„Мислевме дека Украинците сакаат да ја прекинат оваа војна и да седнат на преговарачка маса, но по нивното влегување во регионот Курск гледаме дека тие го избраа патот на војната, а војната е наша работа“, вели Јермолаев, кој е познат и по прекарот Џедај.
„Нема поголема чест за рускиот воин од тоа да ја брани својата татковина. Ова е патот“, додаде Јермолаев, кој рече дека служел во руските воздушни трупи 15 години.
Тој вели дека сега е во Русија, но одбил да даде дополнителни детали или да каже колку борци биле повлечени.
Телеграм каналот на единицата претходно оваа недела објави дека „поради неодамнешните настани“ единицата се враќа на Крим, во нејзиното седиште.
Западен безбедносен извор за АФП изјави дека околу 100 борци на паравоената единица ја напуштиле Буркина Фасо.
Западните разузнавачи веруваат дека борците на „Мечка“ имаат задача да обезбедат безбедност на водачот на хунтата во земјата Ибрахим Траоре, кој ја презеде власта во 2022 година.
Редоследот на преврати во франкофонската западна Африка – во Мали во 2021 година, Буркина Фасо во 2022 година и Нигер во 2023 година – доведе до драстично зголемување на влијанието на Русија бидејќи руските платеници беа повикани да ги поддржат новите режими.
Водачите на пучистите во Буркина Фасо протераа војници и дипломати од поранешниот колонијален владетел Франција и се обратија кон Русија за воена помош.
Јермолаев одби да разговара за нивните операции во Буркина Фасо, но рече дека имало околу 300 борци на Бригадата „Мечка“ во африканската земја пред упадот на украинската војска во Курск.
„Се разбира, некои остануваат, имаме бази и имот, опрема и муниција, не го носиме сето тоа во Русија.
Во јуни, африкански дипломатски извор изјави за АФП дека „две ротации на авиони со руски инструктори“ пристигнале во земјата од соседен Мали.
Терминот генерално се користи за да се опишат руските платеници кои дејствуваат во Африка.
Јермолаев тврдеше дека неговата група е независна од руското Министерство за одбрана. „Но, ние секогаш им помагаме кога ќе треба“, додаде тој.
Џек Марголин, независен експерт за приватни воени компании, рече дека излегувањето на групата веројатно нема да влијае на бојното поле во африканската земја.
-„Мечките“ имаа ограничено влијание на теренот во Буркина Фасо, главно се фокусирани на обуката и безбедноста на политичкото лидерство. Тие не го преземаа нивото на ризик што го имаат единиците на Вагнер на места како Мали“, изјави тој за АФП во петокот.
„Мечките се само еден дел од тоа како руската војска се распореди во Буркина Фасо и веројатно е дека Русија ќе одржи присуство преку други единици – без разлика дали се поформални или други како Мечки“, додаде тој.
Лу Озборн од мониторот „Сите очи на Вагнер“ ја опиша единицата како „група доброволци“ чии членови потпишале договор со руската воена разузнавачка служба ГРУ.
Вагнер, најозлогласената руска платеничка група, беше расформирана и реорганизирана по смртта на нејзиниот водач Пригожин во мистериозна авионска несреќа минатата година.
Руските безбедносни операции во Африка сега се координирани преку чадор група позната како Африкански корпус.
