За Битола се предвидени многу инфраструктурни проекти. Во новата програма „Платформа 1198“ за Битола е предвидено да се изгради обиколница што ќе ја поврзува со Грција. Предвидено е да се изгради автопат кој што ќе поврзува Битола со Прилеп, а исто така предвидено е да се изгради патот Градско-Прилеп, со тоа што Битола ќе биде поврзана инфраструктурно и ќе има добра можност за економски развој, изјави денеска генералниот секретар на ВМРО-ДПМНЕ и носител во Изборната единица 5 Ѓорѓија Сајкоски.
Порачувајќи дека Битола и битолчани ќе бидат во фокусот на идната влада предводена од ВМРО-ДПМНЕ, Сајкоски истакна и дека во програмата на ВМРО-ДПМНЕ е предвидена реконструкција и рехабилитација на патот Кичево-Охрид. Подобрување на патната инфраструктура кон Ресен.
„Исто така, во програмата на ВМРО-ДПМНЕ „Платформа 1198“ предвидено е подобрување на железничката инфраструктура. Со ова, на Битола ќе дадеме можност за економски раст и развој. Можност за подобра иднина на сите, и за младите и за возрасните. Битола ќе го добие процутот онаков каков што треба да го има низ годините. Битола ќе биде економски центар во регионот“, порача Сајкоски.
