Австралија ќе започне со производство на наведувано оружје со САД следната година за да го зголеми снабдувањето на сојузниците во Индо-Пацификот и американското воено присуство во земјата, вклучително и бомбардери, објавија двете земји по годишните разговори за одбраната.
Австралија и Соединетите држави веќе работат на надградба на воздушните бази во северна и западна Австралија, кои се поблиску до потенцијалните точки на удар со Кина во Јужното Кинеско Море отколку австралиската престолнина Канбера.
По годишните разговори на AUSMIN во Анаполис, во американската сојузна држава Мериленд, американскиот секретар за одбрана Лојд Остин рече дека присуството на ротирачки американски сили во Австралија ќе биде зголемено. Во воведниот говор, Остин рече и дека двете сојузнички земји се соочуваат со заеднички безбедносни предизвици, вклучително и Кина.
Во заедничката изјава објавена по разговорите на AUSMIN, се изразува загриженост поради воената активност на Кина околу Тајван и прекумерните поморски претензии на Кина во Јужното Кинеско Море. Тие „забележаа сериозна загриженост поради опасното и ескалирачко однесување на Кина кон филипинските бродови кои работат легално во филипинската ексклузивна економска зона“.
Нема американски воени бази во Австралија, но во северниот град Дарвин секоја година на шест месеци се распореуваат ротирачки сили на американски маринци, а САД градат капацитети за своите маринци и воздушни ескадрили кои слетуваат во австралиските бази.
Австралискиот министер за одбрана Ричард Марлс рече дека присуството на американските сили во Австралија придонесува за одвраќање во Индо-пацифичкиот регион и дека соработката во производството на наведувано оружје во Австралија ќе се зајакне. Австралија следната година ќе започне со производство на наведувани ракети, според Марлс.