Американските посредници подготвуваат предлог за ублажување на конфликтот меѓу израелската армија и либанскoо шиитско движење Хезболах, кој би започнал со 60-дневен прекин на огнот, изјавија во средата за Reuters два изворa запознаени со преговорите.
Лице информирано за разговорите и висок дипломат кој работи во Либан рекол дека двомесечниот период ќе се искористи за финализирање на целосната имплементација на резолуцијата на Советот за безбедност на Обединетите нации усвоена во 2006 година за да се осигури дека нема оружје во јужен Либан што не припаѓа на либанската војска.
Американската амбасада во Либан не одговорила веднаш на барањето за коментар за Reuters.
Резолуцијата 1701 беше основа на преговорите за ставање крај на минатогодишните борби меѓу Израел и Хезболах, кои избувнаа заедно со војната во Газа и драматично ескалираа во последните пет недели.
Специјалниот пратеник на американскиот претседател Амос Хохштајн, кој работи на новиот предлог, им рече на новинарите во Бејрут претходно овој месец дека се потребни подобри механизми за спроведување со оглед на фактот дека ниту Израел ниту Либан целосно не ја спроведоа резолуцијата.
Висок дипломат и извор запознаен со преговорите за Reuters изјавил дека 60-дневниот прекин на огнот го заменил предлогот минатиот месец на Соединетите држави и други земји кои повикуваат на 21-дневен прекин на огнот како увертира за стапување во сила на Резолуцијата 1701.
Сепак, и двајцата предупредија дека договорот сепак може да пропадне.
„Има искрени напори да се постигне примирје, но сепак е многу тешко да се оствари“, рекол дипломатот.
Функционер информиран за разговорите рекол дека Израел бара опција да изврши „директно спроведување“ на примирјето со воздушни напади или други воени операции против Хезболах доколку го прекрши договорот.
Израелските и американските власти веруваат дека Хезболах конечно е подготвен да се отцепи од Хамас во Газа по тешките удари што либанската група ги доби во изминатите два месеци, вклучувајќи го и убиството на нејзиниот лидер Хасан Насрала, објави американскиот портал Axios.
