Нападот на американските сили на територијата на Јемен покажа целосен презир кон меѓународните закони и имаше за цел само да ја ескалира ситуацијата во регионот, напиша портпаролката на руското Министерство за надворешни работи Марија Захарова на својот Телеграм канал.
„Нападите на САД врз Јемен се уште една манифестација на тоа како Англосаксонците ги искривуваат резолуциите на Советот за безбедност на Обединетите нации и покажуваат целосен презир кон меѓународните закони со цел да ја ескалира ситуацијата во регионот во извршување на нивната деструктивна агенда”, рече таа.
Синоќа вооружените сили на САД и Обединетото Кралство извршија воздушни напади врз позиции под контрола на бунтовниците во неколку јеменски градови, користејќи авиони, воени бродови и подморници. Американскиот претседател Џо Бајден рече дека воената акција била наредена како одговор на „нападите без преседан на Хутите“ врз бродовите во Црвеното Море и дека нападите биле извршени во самоодбрана. Централната команда на американското Министерство за одбрана (CENTCOM) соопшти дека досега погодила повеќе од 60 цели на 16 објекти на Хутите.
По ескалацијата на палестинско-израелскиот конфликт во Појасот Газа, Хутите предупредија дека ќе извршат напади на израелска територија, додека на бродовите поврзани со еврејската држава ќе им забрани да минуваат низ водите на Црвеното Море и теснецот Баб ел-Мандеб до Тел Авив. Според проценките на CENTCOM, јеменската бунтовничка група нападнала повеќе од 20 бродови во Црвеното Море од средината на ноември.
