Нормализацијата на односите меѓу Саудиска Арабија и Израел ќе биде можна само ако се реши прашањето за палестинската државност, изјави саудискиот министер за надворешни работи, принцот Фајсал бин Фархан.
Двете регионални моќници никогаш не воспоставиле дипломатски врски, при што Ријад одбива да ја признае еврејската држава како земја. Минатата година, саудиските и израелските власти одржаа разговори за потенцијална нормализација на билатералните односи под посредство на САД. Сепак, упадот во Израел од страна на палестинската вооружена група Хамас на 7 октомври и последователната операција на ИДФ во Газа, наводно, го ставиле процесот во мирување.
За време на интервјуто за Си-Ен-Ен, кое се емитуваше во неделата, Бин Фархан беше запрашан дали може да има нормализирани врски меѓу Саудиска Арабија и Израел без веродостоен и неповратен пат кон палестинска држава.
„Стабилноста ќе дојде само преку решавање на палестинското прашање“, одговори тој.
Највисокиот саудиски дипломат ги осуди нападите на Израел врз Газа, велејќи дека Ријад е фокусиран на тоа да се осигура дека крвопролевањето ќе заврши.
„Она што го гледаме е дека Израелците ја уништуваат Газа, цивилното население во Газа. Ова е целосно непотребно, целосно неприфатливо и мора да престане“, изјави Бин Фархан.
Според најновите податоци на Министерството за здравство на Газа, бројот на загинати од израелската воена операција во палестинската енклава достигна 25.105, а ранети се 62.681 други. ОН минатиот месец соопштија дека 85 отсто од населението на Газа е внатрешно раселено, додека 60 отсто од инфраструктурата на енклавата е оштетена или уништена.
Во нападот на Хамас во Израел минатата година загинаа околу 1.200 луѓе, а 240 други беа земени како заложници. Повеќе од половина од нив остануваат во заробеништво.
Во четвртокот, израелскиот премиер Бенјамин Нетанјаху ја отфрли можноста за суверена палестинска држава, велејќи дека „Израел мора да одржува безбедносна контрола над целата територија западно од реката Јордан“. Земјата нема да се задоволи со ништо, туку со „апсолутна победа“ во Газа, поосчи тој.
