И покрај претходното противење на извесен број членки на Советот за безбедност при обединетите нации, ноќта кон петокот се одржа расправа за тримесечниот Извештај на УНМИК за ситуацијата на поранешната јужна српска покраина Косово на која приштинските институции едногласно беа повикани да ги укинат таксите од 100 проценти за производи од Србија и БиХ.
Амбасадироте, сепак, изнесоа различни ставови во врска со идната динамика на одржување седници за ситуацијата на Косово.
Рускиот амбасадор Василиј Небензја рече дека Русија ја дели загриженоста со Србија поради сериозноста на ситуацијата со Косово. Тој на косовската амбасадорки Вљора Читаку, која состанокот го нарече „шарада“, ѝ рече дека ако мисли така не била обврзана да дојде, иако е поканета. Т
Додаде дека Русија не прифаќа Косово да се симне од дневниот ред на СБ на ОН и оти треба да биде под постојана контрола на ова тело затоа што ситуацијата е нестабилна и секој момент може да излезе од контрола.
Кина исто така истакна дека го почитува суверенитетот на Србија и резолуцијата 1244 и УНМИК, и подвлече дека е потребно да се пронајде решение за дијалог во рамките на таа резолуција. Претставникот на Кина рече дека СБ на ОН треба да ги продолжи дискусиите за Косово.
Амбасадорката на Велика Британија, Карен Пирс ја поздрави работата на Унмик и истакна дека Косово повеќе не е „акутна криза“, како и дека има многу поважни проблеми во врска со меѓународниот мир.
Претставникот на Германија, Кристоф Хојсген, повика да се направи стратешка проценка на мисијата на Унмик на Косово во согласност со состојбата на терен, додавајќи дека многу задачи на Унмик можат да преземат други организации. Тој рече дека единствен начин Србија да влезе во ЕУ е успешен дијалог и признавање на Косово.
Американскиот амбасадор, Џонатан Коен, рече дека УНМИК го исполнил својот мандат и оти одамна поминало времето за намалување на мисијата на тоа тело. Тој потсети дека САД и претходно барале намалување на мисијата на Унмик, а побара и „итен напредок“ во дијалогот со итно укинување на таксите.
