Историјата на македонскиот народ и воената историја на Македонија беше во фокусот на истражувачката дејност на професор д-р Александар Стојчев (1975-2021), кој на денешен ден, пред три години ненадејно почина. Со својата посветеност и упорност тој зад себе остави импозантен научен корпус и беше еден од најплодните научници од помладата генерација во својата област. Неговите дела од областа на историјата на македонскиот народ и воената историја дадоа огромен придонес за расветлување на исклучително деликатни историски настани. Истражувачката дејност на професор д-р Александар Стојчев беше насочена кон презентирање на нови аргументи и научни сознанија за периодот на Балканските војни (1912-1913) и последиците за македонскиот народ и периодот на Првата светска војна (1914-1918). Преку својата плодна научна кариера Стојчев даде огромен придонес во расветлувањето на еден најтешките периоди во историјата на македонскиот народ, Балканските војни (1913-1914) и територијалната поделба. Не помалку значаен е и придонесот кон проучувањето на Првата светска војна(1914-1918). Стојчев е особено значаен за македонската историска наука и за историографијата и поради обработката и проучувањето на извори за овој временски период кои се и за прв пат научно објавени, како резултат на неговата истражувачка работа. Покрај тоа професор д-р Стојчев е еден од основачите на воената историја на македонскиот народ.
Автор е на повеќе научни дела и монографии „Дојран – воени операции 1915-1918“, Македонија и македонците во Првата Светска војна“, „Македонците во документите на ЦИА“ во два тома. Заедно со проф. д-р Ванче Стојчев, коавтор е на научните трудови „Букурешкиот мировен договор и поделбата на Македонија во 1913“ и „Воена историја на Македонија“, а автор е и на бројни други научни дела.
Покрај тоа, проф. д-р Стојчев се занимаваше и со музејска дејност во чии рамки ја организираше изложбата „Македонско – американските односи низ историјата“ во 2016 година и изложбата „Македонија и македонците во Првата светска војна“ која се одржа во Воениот музеј на Австрија во Виена во 2017 година.
Во март годинава, пост хумно беше промовирано и делото „Македонскиот идентитет и македонското прашање од античко време до 1912 година“, каде професор д-р Александар Стојчев е ко автор заедно со неговиот татко професор д-р Ванче Стојчев.
Професор д-р Александар Стојчев е роден на 5 април 1975 во Белград, република Србија. Во 2001 година дипломирал на Филозофскиот факултет во Скопје при Универзитетот „Свети Кирил и Методиј“, насока историја. Во 2006 година го одбрани магистерскиот труд „Дојранските позиции на Македонскиот фронт 1915-1918“. Во 2009 година докторира на Институтот за национална историја со научниот труд „Македонскиот фронт 1915-1918“.
Во 2009 е избран за доцент по предметот воена историја на воената академија „Генерал Михајло Апостолски“ во Скопје. Од 2013 година тој е вонреден професор на Институтот за национална историја при УКИМ, а ја изведуваше наставата по предметите Балканските војни и Првата светска војна на Факултетот за образовни науки на Универзитетот „Гоце Делчев“ од Штип. Од 2010 до 2021 година е раководител на Службата за воена историја – Воен музеј во Министерството за одбрана.
