Се работи на изнаоѓање алтернативно решение за гасификација на Македонија, информира денеска вицепремиерот и министер за финансии Зоран Ставрески.
Според него, Русија нема да може да го имплементира проектот Јужен тек, со кој требаше да се изгради гасовод под Црното Море до Бугарија и Јужна Европа, поради противењето на Европската унија.
– Иднината на Јужен тек е во рацете на Русија и на Европската унија, така што не е прашање на кое ние може да влијаеме. Можеме да ги следиме состојбите, и ние работиме, работевме и ќе работиме на изнаоѓање алтернативни решенија. Сметам дека постојат такви и во догледна иднина Владата ќе информира за прогресот во однос на изнаоѓање алтернативи, односно изнаоѓање други извори и други пристапи за гас за Македонија, изјави Ставрески.
Тој посочи дека останува да важи договорот Русија да ги врати 60-те милиони долари долг, кои Македонија треба да ги поврати преку изградба на дел од гасификациска мрежа.
– Прашањето на клириншкиот долг не е поврзано со ова. Клириншкиот долг ќе се реализира на начин како што е и објавено, појасни Ставрески.
Рускиот претседател Владимир Путин вчера изјави дека Русија се откажала од проектот за природен гас Јужен тек и дека можеби ќе соработува со Турција за изградба на центар за природен гас за јужна Европа.