Украинскиот претседател Володимир Зеленски кој најави дека ќе го разреши врховниот командант на земјата Валериј Залужни, е предупреден од Службата за безбедност на Украина (СБУ) дека таквиот потег може да доведе до немири, објави „Украинска правда“.
Весникот во средата објави дека било планирано отказот на Залужни да се објави во петокот, на 2 февруари, но потегот бил одложен поради советите од СБУ.
Според изворите, агенцијата посочила да бидат подготвени за немири во украинскиот главен град Киев, доколку генералот, кој е популарен и кај јавноста и кај војниците, биде отстранет.
СБУ, исто така, контактираше со некои од воените команданти, барајќи од нив да внимаваат на нивните војници и да се погрижат никој од нив да не ги напушти своите позиции, додаваат тие.
Извештаите за тензиите меѓу Зеленски и Залужни кружат со месеци, а неуспехот на украинската контраофанзива минатата година се верува дека ги влошил односите.
Во средината на јануари, Блумберг објави дека расправијата меѓу двајцата се случила откако претседателот бил налутен од генералот кој ја опишува ситуацијата на бојното поле со Русија како „ќор-сокак“.
Гласините дека врховниот командант треба да биде сменет се појавија кон крајот на јануари, коишто доаѓаа и од воени и од политички извори. Сепак, тие беа демантирани и од кабинетот на претседателот и од Министерството за одбрана.
Во петокот, Вашингтон пост објави дека администрацијата на Зеленски ја информирала Белата куќа дека е донесена одлука за разрешување на Залужни. Претставниците на администрацијата на Бајден го прифатиле потегот. Тие ниту го поддржуваа ниту се спротивставија, велат изворите на весникот.
Зеленски јавно се осврна на ситуацијата за првпат во интервју за италијанскиот информативен канал RAI TG1 во саботата, велејќи дека планира „замена на низа државни лидери, а не само во еден сектор како војската“. Според претседателот, потребно е „ресетирање“ затоа што „ако сакаме да победиме, сите мора да притискаме во иста насока, убедени во победата“.
Претходно оваа недела, поранешниот украински претседател Пјотр Порошенко предложи Залужни да биде оставен на чело на војската. А, ако Зеленски сака „ресетирање“, тогаш треба да почне од себе и од другите функционери во неговата влада, додаде Порошенко.
