Вилароја, село во северна Шпанија, беше првото што гласаше на парламентарните избори во земјата во неделата, кога сите седум жители со право на глас го дадоа својот глас за само 26 секунди, соборувајќи го сопствениот рекорд.
По отворањето на гласачките места во Шпанија во 9 часот, жителите на тоа село го соборија сопствениот рекорд за три секунди. Во мај, на локалните и регионалните избори, им беа потребни 29 секунди да го завршат гласањето.
Шпанија е полна со села кои се напуштени од младите и полека исчезнуваат.
Вилароја е место во провинцијата Ла Риоха, кое поради малата популација традиционално најбрзо гласа на избори. Од неговите седум жители, според законот, тројца седнале на маса со гласачката кутија, а уште тројца имале улога на замена. Само еден жител без обврска да работи на гласачко место го вметнал своето гласачко ливче.
Седумте жители аплаудираа откако ги ставија гласачките ливчиња во кутијата, а напладне следеше ручекот.
„Ова ни стана традиција“, рече градоначалникот на градот Салвадор Перез пред бројните новинари кои дојдоа да го снимаат тој момент.
Перез е на чело од 1973 година. Во мај тој доби нов мандат на локалните избори, а во септември ќе се навршат 50 години од доаѓањето на власт во Виљароја.
Жителите, главно земјоделци, почнаа да ја напуштаат Виљароја на почетокот на XX век, емигрирајќи во Америка. Вториот емигрантски бран следеше во 1960-те кога беа затворени рудниците за јаглен во кои работеа многу од тогашните 300 жители.
Во Шпанија во неделата беа повикани 37 милиони гласачи на кои, според анкетите, десноцентристичката опозициска Народна партија би можела да ја преземе власта од Социјалистичката партија на премиерот Педро Санчез. Санчез распиша парламентарни избори, планирани за декември, по лошите резултати на неговата партија на локалните и регионалните избори во мај.
