Северна Кореја распореди долж границата со Југот воени бродови со специјалци во обид да покаже висока борбена подготвеност и покрај преговорите кои се во тек меѓу двете држави.
Според воени извори, десетина бродови пристигнале на 60 километри северно од граничната линија меѓу двете Кореи.
Северна Кореја, распоредила двојно повеќе артилериско оружје долж границата. Распоредувањето е во момент кога се водат преговори меѓу двете држави за намалување на тензиите.
Парк: Нема да го прекинеме емитувањето на пропагандните пораки
Jужнокорејската претседателка Парк Геун Хје изјави денеска дека Сеул нема да го прекине емитувањето на пропагандните пораки на границата на Јужна и Северна Кореја, доколку Северна Кореја јасно не се извини за серијата провокации кон Сеул.
Северна Кореја треба да упати јасно извинување и да гарантира дека нема да има натамошни провокации, рече Парк, префрлувајќи ја вината на Пјонгјанг за предизвикување на моменталната воена криза со неговите „провокативни активности“.
Нејзиниот повик кон Пјонгјанг доаѓа во момент кога двете Кореи ги стопираа разговорите на високо ниво за ставање крај на воените закани. Разговорите почнаа во саботата со цел ставање крај на „тензичното одмерување“ долж границата на двете земји.
Северна Кореја и Јужна Кореја ги продолжија преговорите
Северна и Јужна Кореја ги продолжија преговорите на највисоко ниво, со цел избегнување на вооружен судир на Корејскиот Полуостров, по заострувањето на односите помеѓу двете земји во четвртокот.
Разговорите зад затворени врати во пограничното село Панунџом започнаа вчера, брзо по истекот на ултиматумот од Пјонгјанг до Сеул да прекине со емитување на прекугранична пропаганда, продолжија денеска во осум часот изутрина по средноевропско време. Маратонската преговарачка средба во саботата траеше до длабоко во ноќта и беше прекината е во раните утрински часови без конечен договор.
На разговорите присуствувале четири делегати, по два од двете страни, вклучително советници за национална безбедност на јужнокорејската претседателка и човекот што се смета за втор човек зад севернокорејскиот лидер Хван Понг Соа.
Севернокорејската народна армија, на наредба на лидерот Ким Џонг Ун, се наоѓа во полна вооружена и борбена готовност, а Министерството за надворешни работи на Пјонгјанг денеска предупреди дека ситуацијата се наоѓа на раб на војна и дека е тешко да се контролира.
Кризата на Корејскиот Полуостров настана откако неодамна Јужна Кореја преку 11 звучници започна да емитува програма, што содржи најнови вести од корејскиот полуостров и од светот, како и емисии во кои се фали демократијата и економскиот раст на Сеул во однос на репресивната политика на Пјонгјанг. Сеул одбива да ја исклучи пропагандата се додека Пјонгјанг не се извини за експлозијата на мини овој месец во кои двајца јужнокорејски војници, кои биле на патрола, се тешко повредени. Северна Кореја ги отфрла обвиненијата за експлозиите.
