Генералниот директор на Светската здравствена организација (СЗО – WHO) во четвртокот повика на прекин на огнот и да се најде „вистинско решение“ за израелско-палестинскиот конфликт, опишувајќи ја ситуацијата во Појасот Газа како „пеколна“.
Тедрос Аданом Гебрејесус, кој живеел низ војна како дете и чиишто деца се криеле во бункери за време на бомбардирањата во граничната војна на Етиопија со Еритреја од 1998 до 2000 година, емотивно се скрши додека ги опишуваше условите во Појасот Газа каде што израелските бомбардирања убиле повеќе од 25.000 луѓе.
„Навистина верувам поради сопственото искуство дека војната не носи решение, туку повеќе војна, повеќе омраза, повеќе агонија, повеќе уништување. Затоа, да го избереме мирот и да го решиме ова прашање политички“, рече Тедрос на состанокот на Извршниот одбор на СЗО во Женева во текот на дебатата за здравствената криза во Појасот Газа.
„Мислам дека сите рековте решение со две држави и таканатаму, и се надевам дека оваа војна ќе престане и дека ќе се најде вистинско решение“, рече Тедрос пред да го надвладеа емоциите додавајќи дека ситуацијата во Појасот Газа „не може да се опише со зборови. .
Предупреди дека повеќе луѓе во Појасот Газа ќе умрат од глад и болести и ја опиша ситуацијата како „пеколна“.
„Ако сето тоа се додаде, мислам дека не е лесно да се разбере колку е пеколна ситуацијата“, рече тој.
Израелската амбасадорка оцени дека неговиот говор е „целосен крах на лидерството“.
„Изјавата на генералниот директор отелотворува сѐ што не е во ред со СЗО од 7-ми октомври. Тој не ги спомна заложниците, силувањата, убиствата на Израелците или милитаризацијата на болниците и употребата на луѓето од Хамас како жив штит“, рече Меирав Ејлон Шахар во коментари испратени до Reuters.
Таа, исто така, ја обвини глобалната здравствена агенција за „заговор“ со Хамас, велејќи дека СЗО замижува пред воените активности на Хамас во болниците во Газа.
