Шигеру Ишиба во вторникот во парламентот беше потврден за нов јапонски премиер, по што ќе го претстави својот кабинет и ќе ги започне подготовките за предвремените избори на 27-ми октомври.
Поранешниот министер за одбрана победи во тесната трка за челник на владејачката Либерално-демократска партија (LDP) минатата седмица. Шеесет иседумгодишниот Ишиба ќе одржи прес-конференција подоцна во текот на денот, откако царот официјално ќе го назначи, заедно со новата влада, на церемонија во Царската палата во Токио.
Новиот премиер ќе се обиде да го смири јавното незадоволство поради зголемените трошоци за живот и владејачката партија инволвиана во скандали, и да ја балансира нестабилната безбедносна средина во Источна Азија поради се понаметливите Кина и Северна Кореја.
Пратеникот-ветеран, кој важеше за аутсајдер во партијата бидејќи четири пати не успеа да стане нејзин лидер, веќе почна да избира членови и функционери од владата со кои ќе оди на предвремените парламентарни избори на 27-ми октомври. Тие вклучуваат двајца негови ривали во трката за претседател на партијата, Кацунобу Като како министер за финансии и Јошимаса Хајаши како главен секретар на кабинетот, клучна функција што ја вклучува улогата на владин портпарол, рекле за Reuters dва изворa запознаени со ова прашање.
Блискиот сојузник на премиерот, Такеши Иваја, поранешен министер за одбрана, ќе ја преземе функцијата министер за надворешни работи, додека генералот Накатани ќе се врати во министерството за одбрана, функција што ја извршуваше во 2016 година, рекле изворите кои барале анонимност, потврдувајќи ги извештаите на медиумите.
Јоџи Муто ќе го преземе Министерството за економија, трговија и индустрија, изјави друг извор.
Ишиба се залага за побалансирани односи со САД и предложи воспоставување „азиска верзија на НАТО“ за да ја одврати Кина, што висок американски функционер веќе го отфрли како прерано.
Во својот победнички говор во петокот, тој зборуваше за потребата да се зајакне јапонската безбедност по неодамнешните пловења на кинески и руски воени бродови во јапонските води.
Назначувањето на Като на чело на Министерството за финансии ќе се следи внимателно со оглед на тоа што тој имаше клучни функции во владата на поранешниот премиер Шинзо Абе, која водеше експанзивна фискална и монетарна политика.
Индексот Nikkei падна за речиси 5 отсто во понеделникот поради зајакнатиот јен, откако Ишиба го победи Санае Такаичи во трката за претседател на партијата. Индексот закрепна во вторникот.
LDP во континуитет е проследена со скандали, но веројатно е дека ќе остане на власт и по изборите со оглед на слабата опозиција. Партијата владееше со Јапонија поголемиот дел од периодот по Втората светска војна.
