Германскиот канцелар Олаф Шолц, во интервју за ТВ каналот Сат.1, ги отфрли шпекулациите дека Берлин планира да ја намали поддршката за Украина.
Шолц вети дека „ништо“ не може да ги уништи ветувањата на Германија дека ќе обезбеди поддршка за Киев. Исто така, тој смета дека е изненадувачка актуелната дебата за тоа дали Берлин има намера да ја намали воената поддршка за Киев. Шолц потсети дека германската влада планира да додели 4 милијарди евра воена помош за Киев следната година – повеќе од која било друга европска земја.
Дополнително, според одлуката на Г-7, Украина ќе добие заем од 50 милијарди евра, чија камата ќе се финансира со приходи од замрзнати руски средства. Ова, како што истакна Шолц, ќе ѝ овозможи на Украина да го купи потребното оружје. Овој инструмент сè уште не е меѓународно договорен. Сепак, германскиот канцелар тврди дека „нема ништо нејасно во тоа“.
„Франкфуртер алгемајне зонтагсцајтунг“ на 17 август објави дека Германија треба да ја ограничи воената помош за Украина бидејќи, според сегашното планирање на буџетот, сега нема повеќе средства за оваа намена. Причината се мерките за штедење што ги преземаа Сојузниот канцелар и Министерството за финансии.
Германија е вториот најголем снабдувач на оружје на Украина по САД. Берлин досега одвои средства за воена поддршка на Киев и вети идни трошоци во износ од околу 28 милијарди евра. Според буџетскиот договор за 2025 година, 4 милијарди евра ќе бидат наменети за воена поддршка за Украина – половина од сумата за тековната година.
