Спикерот на македонскиот парламент Талат Џафери минатата година во Собранието примил делегација на Република Чеченија, која е во составот на Руската Федерација, којашто во контекстот на актуелните воени случувања во Украина е криена од јавноста, но за која информирале руските медиуми, поради што пратеникот Антонијо Милошоски преку социјалните мрежи побара одговор од функционерот на владејачката ДУИ што било договорено и ветено на средбата којашто судејќи според сѐ имала официјален карактер.
„Чудна посета на Собранието на Македонија се случила на 10.07.2021 година кога Талат Џафери како Претседател бил домаќин на делегација од руската Чеченска Република. На чело на чеченската делегација бил Абдул-Вајед Нијазов, марионета на Кремљ во тамошниот “Исламски културен центар”, поранешен пратеник во Думата и основач на здружението “Муслиманите во поддршка на Претседателот Путин”. Иако за секоја средба со странски гости собранискиот Спикер ги информира медиумите, овој пат Талат Џафери одлучил да биде дискретен и да не сподели што разговарал и дали нешто му ветил на контроверзниот гостин
Гостите од Чеченската Република го посетиле и Тетово каде објавиле дека со општината се договориле за изградба на парк и споменик на Ахмат Кадиров, првиот претседател на Ч.Р. и носител на орден “Херој на Русија”. Инаку Ахмат Кадиров е татко на сегашниот деспотски шеф на Чеченската Република, Рамазан Кадиров, кој со неговите војници ревносно му помага на претседателот на Русија во инвазијата врз Украина, често извршувајќи ги најбруталните операции. Во чест на милениците на Путин од Чеченската Република бил организиран и свечен ручек во елитниот хотел “Буши” во Скопје, но нема информација дали сметката е платена од буџетот на Собранието или платил некој друг. На собраниската веб страна нема информации за овој настан, но за среќа во Агенциите за безбедност има детални извештаи“, пишува Милошоски.
