Цените на нафтата се искачија над 87 долари на меѓународните пазари во вторник под влијание на индициите за посилна побарувачка и намалена понуда од водечките производители.
На лондонскиот пазар цената на барелот за испорака во мај беше за 33 центи повисока отколку на затворањето на тргувањето во понеделникот и изнесуваше 87,22 долари. Вчера ја затвори трговијата во плус од 1,55 долари. На американскиот пазар цената на барелот за испорака во мај денеска порасна за 31 цент, на 82,47 долари. За истиот износ, цената на фјучерс договорите за испорака во април, кои истекуваат во среда, порасна на 83,03 долари. Вчера го заврши тргувањето со добивка од 1,68 долари.
Организацијата на земјите извознички на нафта (OPEC) објави во посебен извештај дека во понеделникот барелoт од референтната нафтена кошница на нејзините членки поскапел за 93 центи на 85,71 долари.
На почетокот од седмицата цените беа поттикнати од намалениот извоз од Ирак и Саудиска Арабија и индициите за посилна побарувачка и економски раст во Кина.
Преработките во кинеските рафинерии се зголеми за 3 отсто во јануари и февруари во однос на истиот период минатата година за да се задоволи зголемената побарувачка за гориво за време на кинеската лунарна нова година. Зголемени се и индустриското производство и прометот во малопродажбата, што бележи солиден почеток на годината.
„Податоците за побарувачката на нафта пријатно изненадија, а цените беа поддржани и од продолжувањето на доброволното намалување на понудата од OPEC+ до крајот на јуни“, вели Џовани Стауново од UBS.
Позначајното зголемување на цените, од друга страна, го запре поголемиот руски извоз и покрај ападите на украинските беспилотни летала врз нафтената инфраструктура.
„Нападите веројатно ќе ја намалат преработката на руската сурова нафта до 300.000 барели дневно, покрај редовните затворања на (рафинериите) заради одржување. Помалата преработка ќе значи поголем извоз на сурова нафта“, напишаа во белешката аналитичарите на „JP Morgan“.
Во март Русија ќе го зголеми извозот на нафта преку нејзините западни пристаништа за речиси 200.000 барели дневно, што ќе следи по месечниот извозен план од 2,15 милиони барели дневно.
Трговците се воздржани и поради седницата на американската централна банка и можните сигнали за каматните стапки, шпекулираат аналитичарите.
„Пазарот може да се консолидира во очекување на сигнал за намалување на каматните стапки од овонеделниот состанок на централната банка на САД“, вели Сувро Саркар од банката DBS.
