Словачката влада размислува за данок на засладените безалкохолни пијалоци и би можела да ги зголеми даноците за тутунските производи како дел од пакетот за буџетска консолидација од 1,4 милијарди евра за 2025 година, изјави во понеделникот премиерот Роберт Фицо.
Буџетскиот дефицит на Словачка наследен од претходната пробриселска влада оваа година би требало да надмине шест отсто од бруто домашниот производ (БДП) и да биде најголем во еврозоната поради значително повисоките државни трошоци. Владата им помага на граѓаните со високите сметки за енергија и ги зголеми пензиите, објаснува Reuters.
Целта е да се заштити економијата и животниот стандард на 5,4 милиони граѓани, според ветувањето на новата влада која стапи на функција на крајот на минатата година.
Буџетските планови за следната година сигнализираат забрзано темпо на намалување на дефицитот во буџетот. Министерот за финансии Ладислав Каменцки рече дека во 2025 година ќе ги зголемат даноците и ќе ги намалат трошоците во еквивалент на еден процент од БДП, двојно повеќе од првично планираното, со цел да се намали дефицитот под три проценти од БДП, горната граница во ЕУ. Вредноста на дополнителните заштеди и зголемениот приход во 2026 година ќе достигне 1,5 милијарди евра, рече Каменцки.
Даноците на засладените пијалоци и тутунските производи ќе изнесуваат околу 100 милиони евра следната година и 243 милиони евра во 2026 година.
Премиерот Фицо истакна дека е против зголемување на и онака високата стапка на данокот на додадена вредност (ДДВ) и додаде дека владејачката коалиција меѓу другото ќе разговара и за намалување на бројот на работни места во државниот сектор.
Словачка мора да го земе предвид и јавниот долг, кој, изразен како удел во БДП, годинава треба да порасне на 59,3 отсто од БДП, според проценките на Меѓународниот монетарен фонд (ММФ – IMF), од минатогодишните 57,9 отсто. Во наредните години треба да ја надмине границата на ЕУ од 60 проценти.
На почетокот од декември, агенцијата Fitch го намали кредитниот рејтинг на Словачка за еден степен, на „А-“, со стабилна перспектива, поради влошувањето на јавните финансии и нејасниот пат на консолидација.
