Словенечката влада во четвртокот објави дека се приклучува на малиот број европски земји кои ја признаваат палестинската државност.
Премиерот Роберт Голоб изјави дека неговата влада се согласила со одлуката за признавање на Палестина и дека мерката ќе ја достави до парламентот на конечно одобрување, најверојатно следната седмица, објави новинската агенција STA.
Словенија го следи патот на Ирска, Норвешка и Шпанија. Тие земји официјално ја признаа независна Палестина претходно оваа недела. Шведска го направи тој потег пред десет години. Сиве овие потези го зајакнаа палестинското прашање во светот, но го налутија Израел.
Повеќе од 140 од 193 земји-членки на Обединетите нации ја признаваат Палестина како суверена држава. Западноевропските земји и САД долго време беа исклучок.
Израелското Министерство за надворешни работи ја осуди одлуката на Словенија во четвртокот да ја признае независната палестинска држава. Министерот за надворешни работи Израел Кац рече дека одлуката, која ќе оди на одобрување во словенечкиот парламент, е „награда за Хамас за убиствата и силувањата“.
Во изјавата Кац вели дека овој потег го зајакнува и Иран, непријателот на Израел, и му штети на „блиското пријателство на словенечкиот и израелскиот народ“. „Се надевам дека словенечкиот парламент ќе ја отфрли оваа препорака“, додаде тој.
