„Среќен Божик, крадци! Регистар на афери, ни еден арамилук да не замине во заборав“, со овој наслов, вечерва хрватската редакција на порталот Index.hr, им го честита големиот христијански празник Божик на своите читатели и ги објавува сите афери во историјата на Хрватска.
– Корумпирани политичари и крадци од параприватниот сектор можат мирно да спијат со идејата дека и најлошата афера ќе биде заборавена за една недела. И главното беше така, затоа што ќе излезеше нова.
Аферите се сменуваа една со друга, брзо доаѓаа и уште побрзо се забораваа, а тие продолжуваа да крадат, мамат, да местат јавни тендери, да пренаменуваат земјишта и делеа јавни пари (на хрватските и европските даночни обврзници) како да се од баба им, уништувајќи ја притоа хрватската иднина, моралот на нацијата, како и идејата дека сè може да успее со работа и чесно. Сè заминуваше во заборав, пишува порталот.
Index Afere – Регистарот на сите афери во историјата на Хрватска е овде за на едно место да ги собере и каталогизира сите афери, потсетува на нив, и ги одбројува деновите на оние кои не ги решиле.
Ќе се погрижиме ничија афера да не биде заборавена. Ова е божиќен подарок за сите корумпирани политичари во историјата на Хрватска и нивните соработници. Среќен Божик, крадци!
Ова е само почетокот. Сè уште не може да се каталогизираат сите афери, бидејќи ги има премногу за една редакција. Но, ќе дојдеме до тоа. Слободно кажете сè што недостасува. Бог простува, Индекс се сеќава“, порачуваат новинарите од оваа хрватска редакција.
Во Регистарот на афери на Индекс е и таа за роботакси – тешка 180 милиони евра која е нерешена повеќе од 800 дена, потоа можеби најновата афера „мрежа“, нерешена 10 дена, митото и градоначалникот на ХДЗ нерешена повеќе од 2.100 дена, несреќата на Баножиќ – нерешена 41 ден, аферата „Реморкер“ која датира од 2009 година и други…
