Кошаркарите на Канада во средата во Манила постигнаа историски репрезентативен резултат пробивајќи се во полуфиналето на Светското првенство со победата над Словенија со 100:89 (26:24, 24:26, 30:21, 20:18), а за два дена ќе се соочат со српската репрезентација во борба за пласман во финалето.
Првото име на натпреварот беше Шаи Гилџеус-Александер кој дуелот го заврши со 31 поен, 10 скока и четири асистенции. Реџеј Барет постигна 24 поени и девет скока, а Дилон Брукс и Никеил Александар-Вокер постигнаа по 14 поени. Лука Дончиќ беше најдобар словенечки стрелец со 26 поени, а најголем асистент имаше во Клемен Препелич, кој постигна 22 поени.
Во првите две четвртини од натпреварот ниту една екипа не успеа да изгради поопиплива предност, а најголемото водство за двете екипи беше изразено со четири коша. Затоа, не е чудно што репрезентациите на големата пауза заминаа нерешено (50:50). За ваков резултат Словенците погодија десет „тројки“ од само 17 обиди.
Отворањето на вториот дел целосно им припадна на Канаѓаните, кои најпрвин со серија од 11:2 стигнаа до +9 (61:52), а потоа таа предност ја зголемија на +16 (77:61). Третата четвртина Словенците успеаја да ја затворат со серија од 7:0 и во последните 10 минути влегоа со едноцифрена негатива (71:80).
На ист начин одговорија Канаѓаните на почетокот од последниот дел од дуелот и повторно отидоа на +16 (87:71). Канада беше без Дилон Брукс од 33. минута, кој заработи втора, дисквалификативна техничка грешка. Сепак, само триесетина секунди подоцна, на големо жалење на словенечките кошаркари и навивачи, истата судбина го снајде и Лука Дончиќ, кој уште еднаш премногу комуницираше со судиите и на крајот го оштети својот тим.
Во моментот на исклучувањето на Дончиќ, Канада имаше 15 поени предност (92:77). Без својот капитен, најмногу благодарение на Клемен Препелич и Грегор Хроват, Словенија успеа повторно да ја намали на едноцифрена негатива во 36. минута (85:94). При тој резултат Николиќ и Препелич промашија тројки, а на другата страна Шаи Гилџеус-Александер направи полагање за 96:85. Една минута подоцна, најдобриот канадски играч по еден скок во нападот, заработи лична грешка и ги погоди двете слободни фрлања за 98:85.
За конечно да го потврди пласманот на Канаѓаните во нивното прво полуфинале на светските првенства, ветеранот Кели Олиник ја протна топката низ обрачот на минута пред крајот за конечни 100:89.
Со поразот од Словенија во средата познати се европските претставници кои директно се пласираа на олимпискиот турнир во Париз, а тоа се селекциите на Германија и Србија.
Полуфиналето на Мундијалот е закажано за петок: од 10.45 часот Србија игра со Канада, а од 14.40 часот САД со Германија.
